Ákimderge aýyldy damytýǵa jeke ınvestıtsııa tartýdy jedeldetý júkteldi

ASTANA. QazAqparat – Úkimet basshysy Álıhan Smaıylov aýyldardy damytý baǵytynda mınıstrlikterge birneshe mindet júktedi, dep habarlaıdy QazAqparat tilshisi.

«Birinshiden, Ulttyq ekonomıka mınıstrligi óńir ákimdikterimen birlesip, «Aýyl – el besigi» sheńberindegi barlyq jobany sapaly ári ýaqytyly iske asyrylýyn qamtamasyz etýi kerek. Ekinshiden, Qarjy mınıstrligi Ulttyq ekonomıka mınıstrligimen jáne oblys ákimdikterimen birlesip, respýblıkalyq jáne jergilikti bıýdjetterden «Aýyl – el besigi» jobasyn barynsha qarjylandyrý máselesin pysyqtasyn. Bul rette, arnaıy nazardy shekaralas ornalasqan aýyldardyń damýyna aýdarý kerek», - dedi Premer-Mınıstr Álıhan Smaıylov Úkimet otyrysynda.

Úkimet basshysy málimdegendeı, óńir ákimderi aýyldardy damytý úshin jeke ınvestıtsııalar tartý jumysyn jedeldetýi tıis.

«Tórtinshiden, Ulttyq ekonomıka mınıstrligi múddeli memlekettik organdarmen jáne óńir ákimdikterimen birlesip, barlyq qajetti sharalardy qoldansyn jáne aýyldyq aýmaqtardy damytý tujyrymdamasynyń nysanaly ındıkatorlaryna qol jetkizýdi qamtamasyz etsin», - dedi ol.