Ákimderdiń jumysy syrtqy ınvestıtsııa tartýmen baǵalanatyn bolady - Túımebaev
ShYMKENT. QazAqparat - Ońtústik Qazaqstan oblysynyń damýyna syrtqy ınvestıtsııanyń qosar úlesi zor bolýy kerek. Ol úshin aýdan ákimderi kásipkerler men ınvestorlarǵa barlyq tıisti jaǵdaılardy jasaýǵa mindetti. Bul týraly búgin oblystyq ákimdikte ótken selektorlyq otyrysta aımaq basshysy Janseıit Túımebaev málim etti, dep habarlaıdy «QazAqparat HAA tilshisi.
Ákim okrýg basshylarynan jyl sońyna deıin aıaqtalýy tıis qurylys nysandaryndaǵy jumystardy jyldamdatyp, sapaly ári merzimdi aıaqtaýǵa qol jetkizýdi talap etti.
Selektorlyq otyrystyń kúntártibinde negizgi úsh másele qaraldy. Onyń alǵashqysy oblystyń 2016-2020 jyldarǵa arnalǵan «Damý» baǵdarlamasy ındıkatorlarynyń 6 aılyq oryndalý jaıy sóz boldy. Bul rette oblystyq ekonomıka jáne bıýdjettik josparlaý basqarmasynyń basshysy Arman Sábıtov óńirge 180,6 mlrd teńge ınvestıtsııa baǵyttalyp, 2016 jyldyń tıisti kezeńinen 33 paıyzǵa artqanyn atap ótti. Sondaı-aq ınvestıtsııa kóleminiń ulǵaıýy munaı óndirý zaýytynyń jańǵyrtý jumystarynyń esebinen oryn alyp otyrǵanyn, ári bul kórsetkish respýblıka boıynsha 1-orynda ekenine toqtaldy. Desek te, birqatar aýdan qala ákimdikterinde tek bıýdjettik ınvestıtsııalarmen shektelip, jeke ınvestıtsııa tartý boıynsha jumystar tómen deńgeıde júrgizilýde. Osy máselege naqty mán bergen óńir basshysy aýdan-qala ákimderine tıisti eskerpeler jasap, tapsyrmalar júktedi.
«Aýdan-qala ákimderiniń jumysy osy syrtqy ınvestıtsııa tartý kórsetkishterine qaraı baǵalanatyn bolady. Jyl sońynda barlyq ákimderdiń jumysy saralanǵanda osy máselege mán beriledi. Sondyqtan qarap otyrmaı syrtqy ınvestorlardy qyzyqtyratyn jaqsy jobalardy ázirlep, memleket tarapynan jasalynatyn barlyq jaǵdaılardy tıisti deńgeıde atqarǵandaryńyz jón», - dedi Janseıit Qanseıituly.
Selektorlyq otyrysta oblystyq qurylys salasy da áńgimege arqaý boldy. 2017 jyly oblys aýmaǵynda oblystyq qurylys jáne aýdan-qala ákimdikteri tapsyrys berýshi bolyp tabylatyn 209 ınvestıtsııalyq jobanyń iske asyrylýyna 64,9 mlrd.teńge qaralǵan. Qurylysy josparlanǵan 209 nysannyń, jyl sońyna deıin 116-in paıdalanýǵa tapsyrý josparlansa, 93 nysan 2018 jylǵa ótpeli. Osy rette oblystyq bilim basqarmasy basshysynyń mindetin atqarýshy Raýshan Ergashov sóz alyp, aldaǵy qyrkúıekte 20 mektep el ıgiligine beriletinin aıtty.
Al oblystyq densaýlyq saqtaý basqarmasynyń basshysy Muhan Egizbaev bolsa, kúrdeli jáne aǵymdaǵy jóndeýden ótip jatqan nysandardyń barysyn baıandady. Sonymen qatar jıyn barysynda qysqy maýsymǵa daıyndyq barysy da talqylandy. Ásirese, bilim uıalary men áleýmettik nysandardyń qysqa ázirligine jiti mán berilýi kerektigi aıtyldy. Jalpy oblystaǵy 3 209 bıýdjettik mekemeden aldaǵy jylý maýsymyna 2 677-si daıyndalǵan.
«Jylý maýsymyna daıyndyq jumystary 25 tamyzǵa deıin tolyq aıaqtalýy kerek. Jylytý maýsymyna qajetti kómir, suıyq otyn, mazýt sekildi qajettilikter osy aıdyń sońyna deıin jınaqtalyp, qorda turýy tıis. Bul rette aýdan-qala basshylary men tıisti sala basshylary aptalyq esep berip otyratyn bolady», - dedi oblys ákimi.
