Ákimderdiń qyzmetin jańa jumys oryndaryn ashý reıtıngisi boıynsha baǵalaý qajet - D. Nazarbaeva
Búgin Parlament Májilisinde «Jumyspen qamtý-2020» baǵdarlamasynyń oryndalý barysyna arnalǵan Úkimet saǵatynda Áleýmettik-mádenı damý komıtetiniń tóraıymy depýtat Darıǵa Nazarbaeva osylaı málimdedi.
Depýtattyń aıtýynsha, óńirlerdegi jumyspen qamtýǵa, áleýmettik qoldaýǵa qatysty ótinish bergen tulǵalardy tirkeýdiń avtomattandyrylǵan júıesi durys jumys istemeıdi. Sonyń saldarynan aqparattyq júıe jáne jergilikti atqarýshy organdardyń usynǵan málimetteriniń arasyndaǵy aıyrmashylyq aıtarlyqtaı. Aqparattyq júıe naqty málimetter bermegendikten, statıstıkalyq esep oblystyq basqarlamalardyń qaǵazben usynǵan málimetteri boıynsha qalyptasady. «Baǵdarlamadaǵy taǵy bir problema ortalyq ýákiletti organnyń jergilikti ózin-ózi basqarý organdary men jeke qurylym arasyndaǵy ózara baılanysqa qatysty bolyp otyr. Bul shara óńirlerde nashar uıymdastyrylǵan nemese keıbir aımaqta múldem uıymdastyrylmaǵan deýge bolady. Sonymen qatar, memlekettik-jeke menshik áriptestik tetikteri qamtylmaǵan. Úkimet «Jol kartasy» boıynsha birqatar ózgerister engizip, jaǵdaıdy túzeýge tyrysyp jatyr. Alaıda, baǵdarlamanyń eki jyly ótip ketti. Sonyń bárin eskere otyryp, bizdiń oıymyzsha, ákimderdiń reıtıngine jańa jumys oryndaryn qurý ındıkatoryn engizgen durys», - dedi D. Nazarbaeva.