Ákimderdiń bıýdjetke qatysty derbestigi de, jaýapkershiligi de kúsheıtiledi
ASTANA. QazAqparat - Búgin Parlament Senaty jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasyn eki oqylym boıynsha talqylap, qujatty qabyldady. Qujat jańa bıýdjettik saıasatty jetildirý tujyrymdamasyn, memlekettik josparlaý júıesin jetildirý tujyrymdamasyn jáne Memleket basshysynyń jekelegen tapsyrmalaryn iske asyrý maqsatynda ázirlengen.
Ekonomıka jáne bıýdjettik josparlaý mınıstri Erbolat Dosaevtyń aıtýynsha, bıýdjetti atqarýdyń ıkemdiligin arttyrý maqsatynda 5 paıyzdan aspaıtyn kólemde respýblıkalyq bıýdjet komıssııasynda qaraýsyz jáne 5-ten 10 paıyzǵa deıingi kólemde respýblıkalyq bıýdjet komıssııasynda qaraý arqyly bir ortalyq memlekettik organnyń bıýdjettik damý baǵdarlamasy arasynda qaıta bólý múmkindigi kózdeledi. Sonymen qatar, zańnamada nysanaly damý transfertterin iske asyrý kezinde ákimshiler men jergilikti atqarýshy organdardyń derbestigin arttyrý qarastyrylady. Atap aıtqanda, memlekettik organdardyń nysanaly damý transfertteri boıynsha bir bıýdjettik baǵdarlama ishinde óńirler arasynda 10 paıyzdan aspaıtyn kólemde qarajatty qaıta bólý kózdeledi. Al ákimder úshin nysanaly transfert boıynsha bir bıýdjettik baǵdarlama ishinde jergilikti bıýdjettik ınvestıtsııalyq jobalar arasynda 10 paıyzdan aspaıtyn kólemdegi qarajatty derbes qaıta bólý qarastyrylady. Atalǵan shara nysanaly damý transfertterin iske asyrýdyń tıimdiligin arttyrýǵa jáne ilgeriletip iske asyrylatyn jobalarǵa qarajatty jedel aýdarýǵa múmkindik beredi. Toqtala ketetin jaıt, ákimderge derbestik berýmen qatar, olardyń nysanaly transfertter boıynsha nátıjelerge qol jetkizbegeni úshin jaýapkershilikter engiziletin bolady.
Budan bólek, zań arqyly jergilikti kontsessııalyq jobalardy iske asyrýdy jedeldetýge, «Halyqtyq ІRO» baǵdarlamasyn iske asyrýǵa, «Doing Business» reıtınginiń ındıkatorlaryn jaqsartýǵa, bank sektoryn saýyqtyrýǵa baǵyttalǵan ózgerister qamtylyp otyr. Máselen, memlekettik jeke menshik áriptestiktiń jergilikti jobalaryn iske asyrýdy jedeldetý maqsatynda quny 4 mln. aılyq eseptik kórsetkishten asatyn jobalardy qospaǵanda olardyń saraptamasyn jergilikti jerlerde bekitý usynylady. Al «Halyqtyq ІRO» baǵdarlamasyn jalǵastyrý sheńberinde ulttyq kompanııalardyń aktsııalar paketiniń ishki naryqqa josparlanyp otyrǵan shyǵarylýyna baılanysty magıstraldyq temirjol jáne ulttyq elektr jelilerin ulttyq kompanııalarǵa ıelikten shyǵarýǵa tyıym salý qarastyrylǵan. Sonymen qatar, mundaı strategııalyq nysandardyń menshik ıesi bolyp tabylatyn ulttyq kompanııalardyń aktsııalaryn «samuryq-Qazyna» qorynyń ıelikten shyǵarýyna shekteý qoıý usynylady.
«Doing Business» reıtınginiń ındıkatorlaryn jaqsartý maqsatynda eldi mekender sheginde nysandar qurylysy úshin jer ýchaskelerin berý rásimderin jeńildetý, «bir tereze» qaǵıdaty boıynsha jer telimin berýdi avtomattandyrý usynylady.
