Ákimderde jerdi bólý quziretiniń bolýy durys emes – Aqylbek Kúrishbaev
«Jalpy, 2016 jyly qurylǵan memlekettik jer komıssııasynyń óz ýaqytynda qoǵamdaǵy túrli pikirlerdi biriktirip, jer qatynastaryn jetildirý jónindegi negizgi usynystardy eskergenin atap ótkim keledi. Sondyqtan, meniń oıymsha, qazirgi jer komıssııasy óz jumysynda sol usynystardy negizge alýy kerek. Ókinishke qaraı, olardyń bir bóligi iske asyrylmaı qaldy. Máselen, elde jer resýrstaryn júıeli baqylaýdy qamtamasyz etý úshin, biz memlekettik jer ınspektsııasynyń vertıkalyn qalpyna keltire almadyq. Sonymen qatar, Jer resýrstaryn basqarý komıtetinde tek 38 adamnan turatyn ortalyq apparaty bar. Aımaqtyq jer ınspektsııalary jergilikti atqarýshy organdarǵa berilgen. Sonda aýdan ákimi jerdi ózi bóledi, ózi ony baqylaıdy. Bul durys emes», - dedi Aqylbek Kúrishbaev.
Onyń atap ótýinshe, elimizde topyraq-agrohımııalyq zerthanalar jelisin qurý máselesi de sheshilgen joq. Sondyqtan jalǵa berilgen jer telimderiniń topyraq qunarlylyǵy ne bolyp jatqanyn naqty bilmeımiz.
«Ákimdikter aýyldyq eldi-mekenderdi jaıylymdarmen qamtamasyz etý máselesin sońyna deıin sheshe almady. Jer resýrstaryn basqarý komıtetiniń málimetinshe, qazir aýyldyń malyn jaıýǵa 32 mln gektardan astam jaıylym jetispeıdi. Bul Úkimettiń qaraýyna 2016 jyly jer komıssııasy shyǵarǵan máselelerdiń bir bóligi ǵana, olar áli kúnge deıin túpkilikti sheshimin tappady», - dedi senator.
