Ákimder jumys oryndarynyń qysqarýyna monıtorıng jasap otyrýy tıis
ASTANA. QazAqparat - Oblys ákimderi jumys oryndarynyń qysqarýyna monıtorıng jasap otyrýy qajet. Bul týraly búgin eńbek qatynastaryn retteý jaıy qaralǵan Úkimet otyrysynda QR Premer-Mınıstriniń orynbasary Gúlshara Ábdiqalyqova aıtty, dep habarlaıdy QazAqparat tilshisi.
«Oblys ákimderine aıtatyn másele - jumys oryndarynyń qysqarýyn ary qaraı baqylap, monıtorıng jasap otyrý qajet. Qysqarǵan jaǵdaıda jumysqa turǵyzý máselesin qaraý mindeti tur. Sonymen qatar, aılyq tabys boıynsha qaryzdyń ary qaraı kóterilmeýine jáne bar qaryzdy jabý máselesine basa kóńil aýdarýlaryńyzdy suraımyn», - dedi Úkimet basshysynyń orynbasary.
Gúlshara Ábdiqalyqova búgingi Úkimet otyrysynda eńbek qatynastaryn retteý, óndiristik qaýipsizdik jaqsartý máselelerine qatysty aıtylǵan usynystar aǵymdaǵy jyldyń 2-toqsanynda Qaraǵandy qalasynda ótetin úshjaqty komıssııada qaralatynyn jetkizdi.
Aıta keterligi, otyrysta Eńbek jáne halyqty áleýmettik qorǵaý mınıstri Berdibek Saparbaev kásiporyndar qyzmetkerlerine 1 mlrd 700 mln teńge jalaqy qaryz ekenin, kásiporyndaǵy jalaqy jyl saıyn ınflıatsııa deńgeıinde kóbeıip otyrýy qajettigin aıtqan edi.
Al QR Kásipodaqtar federatsııasynyń tóraǵasy Baqytjan Ábdiraıym jumysshylardyń áleýmettik-eńbek quqyǵyn shekteıtin zańnamalyq aktilerge moratorıı jarııalaýdy, oblystyq úshjaqty komıssııalar jumysyn jandandyryp, ujymdyq sharttar boıynsha máseleni turaqty túrde qadaǵalap otyrýdy, jalaqysy tómen qyzmetkerlerdiń eńbekaqysyn satyly túrde ósirýdi usynǵan bolatyn.
