Ákimder «Týǵan jerdi» syltaýratyp, kásipkerlerdi jumysqa jegýi múmkin - saıasattanýshy Ábdiǵalı
"Men oılaımyn, bul jerde psıxologııalyq kategorııa bar. Qazir Elbasy aıtty dep, ákimder kásipkerlerdi aýylǵa kómektesýge májbúrleýi múmkin. Ondaı sharalar shyn júrekten jasalýy qajet. "Sen óz aýylyńa ne istediń?" degen suraq qoıǵanda uıat oıanýy kerek. Sosyn adam el aldyndaǵy paryzyn sezinýi tıis. Osy eki sezim áreketke ıtermeleıdi. Árkim qolynan kelgenshe kómektesedi. Balany oqyta ma, basqa bir jumys jasaı ma, eń bastysy, janashyrlyq bolsyn. Janashyrlyq sezim bolsa, ol aýylǵa qyzmet etedi, shamasy kelgenshe aýyldy kóterýge tyrysady. Ol úshin kásipker bolý mindet emes. Professor, akademık bolsa, aýyldyń mektebine baryp, dári oqysyn. Onyń da úlken tárbıelik máni bar ǵoı", - dedi Ábdiǵalı búgin efırge shyqqan "1 stýdııa" baǵdarlamasynda.
Májilis depýtaty Bekbolat Tileýxan da naýqanshylyqqa salynbaý qajet de sanaıdy. Aýylǵa degen kómek shyn nıetpen jasalýy qajet. "Al, endi qazir naýqanshylyqqa salynyp, "Sen aýylyńa ne istediń?" dep bárin tergeıtin bolsaq, "Osylar-aq bále boldy ǵoı" deıdi de, bes-on tıyn aýdara salady. Alaıda sharýa onymen bitpeıdi", - dep atap kórsetti Tileýxan.
"Aýyl" partııasynyń tóraǵasy, senator Álı Bektaevtyń oıynsha, "Týǵan jer" baǵdarlamasy aıasynda árbir adamnyń óz aýylyna degen kómegin retke keltirip, naqty máselelerdi sheshýge ábden bolady. "Qazirgi kezde ákimder osy jumystyń basy-qasynda júrýi tıis. Aýylǵa ne kerek? Sony jasatyp alýy qajet. Bolmasa, árkim baryp, meshit sala berse, árkim baryp, mektep sala berse, ol da durys emes. Aýylǵa mektep emes, aýrýxana kerek shyǵar. Ol jerge meshit emes, balabaqsha qajet bolar. Osyny josparly túrde jasaýǵa bolady", - dedi Bektaev.
