Ákimder sý tasqyny zardaptaryn azaıtý máselelerin jeke baqylaýda ustaýy tıis - Premer

Premer-Mınıstr Álıhan Smaıylov sý tasqynyna qarsy is-sharalardyń Jol kartasyn iske asyrý máseleleri boıynsha keńes ótkizdi, dep habarlaıdy QazAqparat Úkimettiń baspasóz qyzmetine silteme jasap.

Tótenshe jaǵdaılar mınıstri ıÝrıı Ilın bıylǵy kóktemde eldi mekenderdi sý basýdyń negizgi sebebi egistikterden erigen qar men jańbyr sýlarynyń mol aǵýy ekenin aıtty. Bul oraıda sý tasqynyna qarsy is-sharalardy ýaqytyly júrgizý arqyly ǵana TJ týyndaý táýekelin tómendetýge bolady.

Onyń aıtýynsha, qazirgi ýaqytta sý tasqyny qaýpi bar eldi mekenderdiń tizimine túzetý engizildi, olardyń sany 1 046-ǵa deıin artty. Sonymen qatar ákimdikter tıisti is-sharalardy qarjylandyrý máselesin elemeı otyr, osyǵan baılanysty is-sharalar ýaqytyly oryndalmaı qalýy múmkin.

Óńirlerde jol kartasy is-sharalarynyń iske asyrylý barysy týraly Túrkistan oblysynyń ákimi Darhan Satybaldy, Batys Qazaqstan oblysynyń ákimi Ǵalı Esqalıev jáne Aqtóbe oblysynyń ákimi Eraly Toǵjanov baıandady.

Premer-Mınıstr Jol kartasynyń osy jylǵa arnalǵan is-sharalaryn iske asyrý jónindegi jumystardy aıaqtaýdy jedeldetýdi, sý basyp qalatyn qaýipti jerlerdi ǵımarattar salýǵa berip qoımaý úshin olardy sýdan qorǵaý beldeýlerine ýaqytyly aýystyrýdy qamtamasyz etýdi, sondaı-aq tıisti qurylys normalary men erejelerinde jaýyn-shashyn kárizderi júıeleriniń ótkizý qabileti normalaryn qaıta qaraýdy tapsyrdy.

«Kelesi kóktemde sý tasqynyna daıyn bolý úshin qazirden-aq qomaqty qarjy shyǵyndaryn qajet etpeıtin aldyn alý jumystaryn júrgizý kerek. ıAǵnı ózen arnalaryn, aryqtar men kanaldardy, drenaj júıelerin tazartý, qorǵaý bógetterin salý jáne gıdrotehnıkalyq qurylystardy daıyndaý jumystaryna basa nazar aýdarý kerek. Jalpy óńir ákimderi sý tasqynynyń zardaptaryn azaıtý máselelerin jeke baqylaýda ustaýy tıis», — dedi Úkimet basshysy.

Foto: t.me/KZgovernment