Ákimder sý qoımalarynda adamdardyń qaýipsiz demalysyn qamtamasyz etý jóninde keńester ótkizedi - QR Premer-Mınıstriniń tapsyrmasy
ASTANA. 19 maýsym. QazAqparat - Búgin QR Premer-Mınıstri Serik Ahmetov sý qoımalarynda, órtterde jáne joldarda qaýipsizdikti qamtamasyz etý máseleleri boıynsha selektorlyq keńes ótkizdi, dep habarlady Úkimet basshysynyń baspasóz qyzmeti.
Keńesti asha otyryp, S.Ahmetov shomylý maýsymy bastalýymen sý qoımalarynda adamdardyń, ásirese, balalardyń qazaǵa ushyraýy jıilep ketkenin atap ótti.
"Adamdardyń qaýipsiz demalysyn qamtamasyz etý jóninde pármendi sharalardy qolǵa alý kerek dep sanaımyn. Órtter sanynyń kóbeıýine alańdaýshylyq ta bar, onyń ústine qazir órt qaýpi kezeńi bastaldy", dedi Premer-Mınıstr.
QR Tótenshe jaǵdaılar mınıstri Vladımır Bojko aǵymdaǵy jylǵy 5 aıda respýblıkada 57 adam, sonyń ishinde 13 bala sýǵa ketkenin habarlady. Sýlarda barlyǵy 171 adam, sonyń ishinde 36 bala zardap shekti, odan 114 adamdy, sonyń ishinde 23 balany sýdan qutqarý qyzmetteri qutqaryp qaldy. Almaty oblysynda - 13 adam, Ońtústik Qazaqstan oblysynda - 10, Qyzylorda oblysynda 8 adam, ıaǵnı sýda ketkender sany kóbirek bolyp otyr.
Mınıstrdiń málimetteri boıynsha, el aýmaǵynda 50 myńnan astam sý qoımalary bar, olardy halyq sýǵa túsýge, demalýǵa, balyq aýlaýǵa paıdalanady, sondyqtan da adamdardyń qaıǵyly jaǵdaıǵa ushyraý yqtımaldyǵy úlken.
"Taldaý kórsetip otyrǵandaı, adamdar osy maqsatqa arnaıy daıyndalmaǵan oryndar men demalys aımaqtarynda, ata-analarynyń baqylaýynsyz qalǵan balalar arnalar men aryqtarǵa sýǵa ketip, mert bolýda", - dedi V.Bojko.
Osyǵan baılanysty TJM 2013 jylǵy shomylý kezeńinde sý qoımalarynda qaıǵyly oqıǵalardy boldyrmaý jáne sanyn azaıtý jóninde birlesken sharalar josparyn jasady jáne ol kelisildi. Sýdan qutqarý qyzmetteri 4 myńnan astam sý qoımalaryn túgendeýden ótkizdi, shomylýǵa bolatyn 535 demalys aımaqtary belgilendi, sý alaptary ıelerimen jaǵajaılardy ázirleý jóninde túsindirý jumystary júrgizildi, 200 balalar lagerleri erekshe baqylaýǵa alyndy.
Sýdan qutqarý stansalaryna jaqyn ornalasqan balalar jaǵajaılarynda balalardy júzýge úıretý jumystary júrgizilýde. Ótken jyly qutqarýshylar 12 myńnan astam balalardy sýda júzý daǵdylaryna úıretti.
"2013 jylǵy órt qaýpi maýsymy bastalǵaly beri Qazaqstan aýmaǵynda 75 tabıǵı órtter tirkeldi, olardyń aýdany 225 gektardy quraıdy, kelgen shyǵyn - 8 mln. 677 myń teńge. Aǵymdaǵy jyly 2012 jyldyń tıisti kezeńimen salystyrǵanda órtter sany 4 esege, sharpylǵan aýdany 3,3 esege azaıdy, keltirilgen shyǵyndar - 6,6 ese az", dep habarlady V.Bojko.
Tabıǵı órtterge baılanysty órt qaýpi kúsheıgen jaǵdaıda Úkimet aımaqaralyq sıpattaǵy ormandy-dalaly órtterdi joıý josparyn bekitti. Osy josparǵa sáıkes iri órtter aımaǵyna 24 myń adam jáne 4 myń birlik ártúrli tehnıka, sonyń ishinde 12 tikushaq, 45 órt poıyzdary jumyldyryla alady, dep sendirdi mınıstr.
Talqylaýdy túıindeı kelip, Úkimet basshysy sý qoımalaryndaǵy qaýipsizdik pen órt qaýipsizdigi máselelerin erekshe baqylaý qajettigin atap ótti. Osyǵan baılanysty S.Ahmetov barlyq deńgeıdegi ákimderge barlyq qalalar men aýdandarda sý qoımalarynda adamdar demalysynyń qaýipsizdigin qamtamasyz etý jóninde tıisti keńester ótkizýdi tapsyrdy.
S.Ahmetov sondaı-aq múddeli memlekettik organdarmen tıisti birlesken jospar qabyldaýǵa ókim berdi. "Bul sý qoımalarynda adamdardyń qaıǵyly jaǵdaıǵa ushyraýyn boldyrmaý jáne onyń aldyn alý jónindegi keshendi sharalar. Órt qaýipsizdigin erekshe atap ótkim keledi. TJM tarapynan tıisti nusqaýlar jiberildi. Olar bar, olardy qatań saqtaý qajet", dedi S.Ahmetov.
"Aımaqtar ákimderiniń bul máselelerdi erekshe baqylaýǵa alyp, halyq arasynda túsindirý jumystaryn jandandyrýlaryn suraımyn", dep tapsyrdy S.Ahmetov.
