Ákimder óz qaltasy men memleket qazynasyn shatastyryp almaýy kerek - Saparbaev
AQTÓBE. QazAqparat - Aqtóbede aýyl ákimderiniń forýmy ótti. Forýmǵa Batys Qazaqstan, Atyraý, Mańǵystaý oblystaryndaǵy 350-den astam aýyl ákimi qatysty, dep habarlaıdy QazAqparat tilshisi.
Elimizde aýyl ákimderiniń óz bıýdjeti bolady. «Jergilikti ózin ózi basqarýdy damytý máseleleri týraly» Zańyna sáıkes halyq sany 2 myńnan asatyn aýyldar keler jyly birneshe salyqtan túsken qarjyny jergilikti jerge jumsaıdy. Al 2020 jyldap bastap barlyq aýyl ákimi bıýdjet qarjysynyń ıgerilýine, maqsatty jumsalýyna jaýap beredi. Buryn qujattardy qaǵaz júzinde rásimdegen ákimder endi kompıýterge otyryp, elektrondy formatta jumys isteıdi. Barlyq aýylǵa tehnıka jetkizilip, qazir ınternetke qosý jumysy júrip jatyr.
«Sońǵy jyldary jergilikti bıliktiń rólin kúsheıtý úshin tórtinshi dárejedegi bıýdjetti engizý jumysy júrgizilip jatyr. Bul óte durys sheshim. Jergilikti ákimderdiń óz bıýdjeti bolýy kerek. Olar óz shyǵynyn ózderi josparlap, qarjyny jumsaýy tıis. Aqtóbe oblysynda Úkimet tasparmasyna sáıkes jumys júrip jatyr. Óńirde barlyǵy 147 aýyldyq okrýg bar. Onyń 50-i keler jyldan bastap óz bıýdjetin basqarady. Barlyq deńgeıdegi ákimniń qarjylyq, ekonomıkalyq saýattylyǵyn arttyrý úshin arnaıy semınar ótti. Ákimder jumysqa daıyn»,- dedi Aqtóbe oblysynyń ákimi Berdibek Saparbaev.
Qazynaǵa túsken qarjyny basqarý úshin barlyq ákimge kompıýter berilip, ınternetke qosylady. Bul jumys Aqtóbede túgel atqaryldy.
«Birinshiden, ákimder zańdy saqtaýy kerek. Ekinshiden, óz qaltasy men memleket qazynasyn shatastyrmaýy tıis. Sonda jumys júredi»,- dedi Berdibek Saparbaev.
Aýyl ákimderiniń forýmy kezinde memlekettik satý, satyp alýdy júrgizetin mamandarǵa suranystyń artýy múmkin degen boljam aıtyldy. Bul aldaǵy ýaqytta qaralatyn suraq. Sebebi, aýyl halqynyń sany ósip otyrǵan kezde qyzmetkerlerdiń júktemesi artyp, suranys bolýy múmkin.
«Jergilikti ózin ózi basqarý kezinde salyqtan túsken qarjyny aýyl ákimi basqarady. Jeke tulǵalardan alynatyn múlik, kólik, jer salyqtarynan túsken qarjy bıýdjetti tolyqtyrady. Sol qarjy aýyldyń ınfraqurylymyn jańartýǵa, kógaldandyrý jumystaryna jumsalady. Ákim qarjyny óz erkimen basqara almaıdy. Aýyl turǵyndaryn jınap, kezdesý ótkizip, belsendilermen aqyldasyp, eń ózekti problemalardy sheshedi»,- dedi Ulttyq ekonomıka vıtse-mınıstri Aıbatyr Jumaǵulov.
Aıta keteıik, aýyl ákimderiniń keıbiri óziniń tikeleı mindetin bilmeı, salyq ınspektorynyń, ózge qyzmetkerlerdiń jumysyn atqaryp ketken jaǵdaılar kezdesken. Sondyqtan ár ákim zańdy qaıta oqyp, uıymdastyrýshylyq qabiletin arttyrýy kerek. Elimizde Ulttyq ekonomıka mınıstrligi men «Qazaqtelekom» AQ aýyldarǵa ınternet jelisin tartýdy josparlady. Jyl sońyna deıin taǵy 4 aýylǵa ınternet tartylady.
