Ákimder naýqastardy koronavırýsqa testileýdi qamtamasyz etýi tıis - Aqtaeva

NUR-SULTAN. QazAqparat - Barlyq óńir ákimderi naýqastardy koronavırýsqa test zertteýimen qamtamasyz etýi tıis. Bul týraly Úkimet otyrysynda QR Densaýlyq saqtaý mınıstriniń mindetin atqarýshy Lázzat Aqtaeva aıtty, dep habarlaıdy QazAqparat tilshisi.

«Halyqtyń medıtsınalyq kómekke júginýiniń ósýi men halyqqa ýaqtyly jáne sapaly medıtsınalyq kómek kórsetýdi qamtamasyz etý qajettiligin eskere otyryp, oblystardyń, Nur-Sultan, Almaty, Shymkent qalalarynyń ákimderine medıtsınalyq kómek kórsetýdi qamtamasyz etý jóninde sharalar qabyldaýdy, onyń ishinde:

- jedel járdem stantsııalary men emhanalardaǵy call-ortalyqtardyń qýatyn arttyrýdy;

- jedel medıtsınalyq járdem stantsııalarynyń shuǵyl jáne kezek kúttirmeıtin shaqyrýlarǵa ýaqtyly qyzmet kórsetýin qamtamasyz etýdi;

- menshik nysanyna qaramastan óńirdegi bar resýrstardy tarta otyryp, naýqastardy koronavırýsqa test zertteýimen qamtýdy qamtamasyz etýdi usynamyn», - dedi Lázzat Aqtaeva.

Sonymen qatar mınıstrdiń mindetin atqarýshy ınfektsııalyq jáne provızorlyq tósekterdiń talap etiletin sanyn qamtamasyz etý qajettigin atap ótti.

«Ambýlatorııalyq-emhanalyq kómek deńgeıinde úıdegi patsıentterge sapaly dınamıkalyq baqylaýdy júzege asyrýdy; medıtsınalyq uıymdar bazasynda qosymsha zerthanalardy ashý arqyly Bas memlekettik sanıtarııalyq dárigerdiń qaýlysyna sáıkes halyqty PTR-testileýmen qamtýdy keńeıtýdi, halyqpen belsendi aqparattyq-túsindirý jumysyn júrgizýdi usynamyn», - dedi ol.