Ákimder men jergilikti qaýymdastyqqa qosymsha fýnktsııalar berýge baǵyttalǵan zań qabyldandy

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine Qazaqstan Respýblıkasyndaǵy jergilikti ózin-ózi basqarýdy damytý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda talqylap, qabyldady.

Qabyldanǵan Zań Elbasynyń «100 naqty qadam» Ult josparyndaǵy 97-98 qadamdaryn júzege asyrýǵa baǵyttalady.

Atap aıtqanda, Ult josparyna sáıkes, aýyl ákimderine jáne jergilikti qaýymdastyqtyń jınalysyna jergilikti mańyzy bar máselelerdi sheshý boıynsha qosymsha fýnktsııalar berý týraly aıtylǵan. Budan bólek, jergilikti ózin-ózi basqarýdyń bıýdjetin kezeń-kezeńimen engizý, sondaı-aq, azamattardy jergilikti bıýdjettiń jobasyn qalyptastyrý men onyń oryndalýyn talqylaýǵa qatystyrý týraly tapsyrmalar júzege asatyn bolady.

Osy mindetterdi sheshý boıynsha qujatta turǵyndardyń jergilikti mańyzdy máselelerdi sheshýdegi rólin arttyrýǵa, jergilikti ózin-ózi basqarý organdaryna naqty qarjylyq jáne materıaldyq resýrstardy berýge, sondaı-aq jergilikti jerdegi mańyzdy máselelerdi sheshý úshin ákimderdiń qarjylyq jáne ekonomıkalyq derbestigin kezeń-kezeńimen jáne ret-retimen bekitýge baǵyttalǵan normalar qamtylǵan. Bul rette zań arqyly jergilikti ózin-ózi basqarýdyń aýmaqtyq keńesi men onyń jumys isteý tártibi engiziledi. Atalǵan keńes bir nemese birneshe saılaý okrýginiń shekaralarynda qurylatyn qala ákiminiń halyqpen ózara is-qımyl jasaý máseleleri boıynsha oblystyq mańyzy bar qalanyń, respýblıkalyq mańyzdaǵy qala jáne astananyń ákimdigi janyndaǵy konsýltatsııalyq-keńesshi organ bolmaq.

Budan bólek, turǵyndardyń jergilikti mańyzdaǵy máselelerdi sheshýdegi rólin arttyrý jáne olardy sapaly sheshýi úshin jergilikti qoǵamdastyqtyń jınalystarynda talqylanatyn máselelerdiń tizbesi keńeıtiledi. Jergilikti ózin-ózi basqarý organdaryna naqty qarjylyq jáne materıaldyq resýrstardy berý maqsatynda jer ýchaskesi aýdandyq mańyzdaǵy qalada, aýylda, kentte tirkelgen zańdy tulǵalardan alynatyn jer salyǵy, kólik quraldary salyǵy jergilikti ózin-ózi basqarý organdaryna transfertter túrinde túsetin tizbe bekitiledi.

Sondaı-aq, qujat arqyly jergilikti ózin-ózi basqarýdyń qarajaty esebinen alynǵan múlik aýdandyq mańyzdaǵy qalanyń, kenttiń, aýyldyń, aýyldyq okrýgtiń ákimi apparatynyń balansyna bekitilip beriletindigi qarastyrylǵan.

Parlament qabyldaǵan Zań Memleket basshysynyń qol qoıýyna joldanady.