Ákimder men sheneýnikter atqarǵan qyzmetterin naqty ispen kórsetsin - Prezıdent
sp;ASTANA. Qarashanyń 13-i. QazAqparat /Aıdar Ospanalıev/ - Elimizdiń aımaqtarynda jumys istep jatqan jáne aımaqtaǵy azyq-túlik ónimderiniń baǵasyn kóterip otyrǵan alypsatarlardyń áreketterine qatań tyıym salý qajet.
Bul týraly búgin tikeleı jeli arqyly joldanǵan turǵyndardyń saýaldaryna jaýap bergen Elbasy Nursultan Nazarbaev málim etti, dep habarlaıdy QazAqparat.
Tikeleı efır barysynda Memleket basshysy aldymen shekaradaǵy kedendik baqylaý qyzmetiniń Qazaqstannan ımporttalatyn azyq-túlik baǵalaryna qatysty málimetterimen tanystyrdy. Oǵan sáıkes, 1 keli kartoptyń quny kedennen ótetin kezde 24 teńge bolsa, dúkende jáne bólshek saýdada onyń quny 85 teńgege shyqqan. Sondaı-aq pııazdyń baǵasy shekarada 47 teńge bolsa, bólshek saýdada 96 teńge turatyn bolyp shyqty. Osy sııaqty el arasynda keńinen paıdalanylatyn birqatar azyq-túlik taýarlarynyń baǵalaryn tizip shyqqan Prezıdent tań qalǵan keıippen «Munyń barlyǵyn qadaǵalap otyrǵan adam bar ma? Monopolııaǵa qarsy komıtet qaıda qarap otyr? Al Úkimet bul máseleden nege syrt qalýda?» dedi qatal túrde.
Memleket basshysynyń aıtýynsha, «Ekspress K» basylymy jaqynda Pavlodarda 1 kelisi 17-18 teńge turatyn sábizdiń 60 teńgege satylyp jatqandyǵyn jazdy. «Sonda ákimder men monopolııaǵa qarsy qyzmet ókilderi qaıda júrgen. Úkimet nege qalǵyp otyr. Biz nege betimen ketken alypsatarlardyń áreketterin tyıa almaı otyrmyz. Úkimet basshysy qazir teledıdar aldynda otyrǵan bolar. Men oǵan osy máselelerdiń barlyǵyn jedel túrde sheshýdi tapsyramyn», dedi Prezıdent.
Sondaı-aq óziniń sózinde osy máselege baılanysty jaqsy jańalyqty jetkizgen Memleket basshysy «Almaty qalasynda «Arzan» degen dúken bar eken. Ol «Raıymbek grýpp» kompanııasynyń saýda orny. Kompanııa ıeleri tikeleı tasymal arqyly azyq-túlik baǵasyn arzandatýǵa qol jetkizgen. Kompanııanyń osyndaı 10 dúkeni bar eken. Biz mundaı kásipkerlerge qol ushyn sozýymyz kerek. Onyń dúkenderin elimizdiń barlyq aımaqtarynan ashý kerek. Kompanııa ıeleri azyq-túlik baǵasyn arzandatýǵa alypsatarlardyń áreketterine tosqaýyl qoıý arqyly qol jetkizgen jáne taýardy óndirýshilermen arnaıy kelisim-shart jasaǵan. Qoryta aıtqanda, sheneýnikter shyn máninde jumys istegisi kelse, ony naqty ispen kórsetsin. Áıtpese májilis, jıyndarda qury qol sermegenderiniń qajeti joq», dedi N.Nazarbaev.
