Ákimder men mınıstrler partııaǵa qatysy bar ekendigin pash etýi tıis – Elbasy
NUR-SULTAN. QazAqparat – Ákimder men mınıstrler partııaǵa qatysy bar ekendigin pash etýi tıis. Bul týraly «Nur Otan» partııasy Saıası keńesiniń keńeıtilgen otyrysynda QR Tuńǵysh Prezıdenti – Elbasy Nursultan Nazarbaev aıtty, dep habarlaıdy QazAqparat tilshisi.
«Munan da jamany keıbir memlekettik organdardyń basshylary, mınıstrler, ákimder ózin partııamen birge ekendigin kórsetkisi kelmeıdi. Partııa bylaı, men bylaı, ózime ózim osy jerde bastyqpyn. «Nur Otan-nyń» barlyq múshesi jarııa túrde partııaǵa qatysy bar ekendigin pash etýi tıis. Partııa tósbelgisin búgingi otyrysqa ǵana taǵyp kelmeý qajet», - dedi Nursultan Nazarbaev.
Osy rette QR Tuńǵysh Prezıdenti Ońtústik Shyǵys Azııa elderiniń tájirıbesin úlgi etti.
«Malaızııada mınıstrler, Premer-Mınıstr, orynbasarlary, barlyǵy tósbelgi taǵyp júredi. Kóshede adamdar memlekettik qyzmetshi kele jatqanyn kóredi. Al biz she? Partııa múshesi ekendigimizden qorqamyz ba? Onda shyǵyńyzdar, basqasyn tańdap alamyz», - dedi Elbasy.
