Ákimder memlekettik satyp alýda jergilikti úlesti arttyra almaı otyr – Asqar Mamın

NUR-SULTAN. QazAqparat – QR Premer-mınıstri Asqar Mamın memlekettik satyp alýdaǵy jergilikti úles boıynsha oblys basshylary áli kúnge deıin tıisti deńgeıde jumys júrgizbegenin málim etti, dep habarlaıdy QazAqparat tilshisi.

«Bıýdjet boıynsha jospar ótken jáne bıylǵy josparǵa qaraǵanda asyra oryndaldy. Alaıda keıbir bıýdjet baǵdarlamalarynyń ákimshileri qarajatty ıgermegen. Igerilmegen qarajattyń kóbi Ekologııa, geologııa jáne tabıǵı resýrstar mınıstrliginde – 1,5 mlrd teńge, Mádenıet jáne sport mınıstrliginde 1 mlrd teńge, Indýstrııa jáne saýda mınıstrliginde 1 mlrd teńge. Óńirler arasynda Almaty qalasy men oblysy, Túrkistan, ShQO jáne Qaraǵandy oblystarynda, BQO, Aqmola oblystary bar. Jyl sońyna deıin eki aı ǵana qaldy. Álıhan Ashanuly, bıýdjet qarajatynyń ıgerilýin baqylaýǵa alyńyz», - dedi Asqar Mamın.

Premer-mınıstr sonymen birge memlekettik satyp alýdaǵy jergilikti úles boıynsha oblys basshylary áli kúnge deıin tıisti deńgeıde jumys júrgizilmegenin málim etti.

«Osynyń saldarynan jergilikti úles boıynsha kórsetkishter tómen bolǵanyn kórip otyrmyz. Sonymen qatar, Qyzylorda, Pavlodar jáne Túrkistan oblystarynyń kórsetkishteri jaman emes ekenin atap ótý kerek. Osy rette Ulttyq kásipkerler palatasy men Qarjy mınıstrligi kórsetkishteri tómen ákimdiktermen memlekettik satyp alý boıynsha semınarlar ótkizýi qajet», - dedi Premer-mınıstr.

Eske sala ketsek, búgingi Úkimet otyrysynda Asqar Mamın qaı mınıstrlikter bıýdjetti ıgere almaı jatqanyn aıtqan bolatyn.