Ákimder QR «Bilim týraly» Zańynyń normalaryn oryndamaıdy
ASTANA. 29 sáýir. QazAqparat - Keıbir jergilikti bılik organdary QR «Bilim týraly» Zańynyń jetim balalardy baspanamen qamtamasyz etý týraly normalaryn múldem oryndamaıdy.
Bul týraly búgin Úkimet janyndaǵy kámeletke tolmaǵandar isi jónindegi úkimetaralyq komıssııa otyrysynda QR Bilim jáne ǵylym mınıstrliginiń Balalar quqyǵyn qorǵaý komıtetiniń tóraıymy Raısa Sher málim etti.
Onyń aıtýynsha, búginde elimizde 34 myńnan astam jetim balalar tirkelgen. Olardyń 24 myńǵa jýyǵy asyrap alýshylar men qamqorshylardyń otbasynda tárbıelenýde. Qalǵan 11 myńdaıy bilim berý, densaýlyq saqtaý jáne halyqty áleýmettik qorǵaý uıymdarynyń ınternattarynda ómir súrýde.
Jetim balalardyń 5 myńnan astamynyń ǵana basynda úıi bolsa, qalǵan 27 myńy baspanaǵa zárý. Balalar úılerinde tárbıelenetin 11 myń jetim balanyń tek 696-synda ǵana (6,4 paıyz) muragerlikpen nemese úles retinde qalǵan baspanalary bar. ıaǵnı balalar úıiniń tárbıelenýshileriniń 10 myńnan astamynyń basynda pana joq degen sóz. R. Sherdiń aıtýynsha, bul balalar kámelettik jasqa tolyp, úlken ómirge aralasqan kezde, úlken problemaǵa tap bolýlary múmkin.
«Sońǵy 7 jylda balalar úılerinen 14 376 túlek shyqty, olardyń 849-y baspanaly boldy. QR Statıstıka agenttiginiń derekteri boıynsha, 2006 jyldan beri elimizde 384 myńnan astam páter qoldanysqa berilgen, al ondaǵy balalar úıleriniń túlekterine tıgen úles nebary 0,2 paıyzdy quraǵan. QR «Bilim týraly» Zańynda jergilikti atqarýshy organdardyń jetim balalar men ata-anasynyń qamqorlyǵynsyz qalǵan balalardy baspanamen múndetti túrde qamtamasyz etýi týraly normalar qarastyrylǵan. Alaıda bul norma búginde múlde jumys jasamaıdy. Sondyqtan da balalar úıleriniń túlekterine berilgen páter sany baspanaǵa zárýlerdiń sanymen salystyrǵanda óte mardymsyz bolyp otyr», - dep atap ótti ol.
