Ákimder halyqty vaktsınalaý jumysyn kúsheıtýi qajet – Eraly Toǵjanov
NUR-SULTAN. QazAqparat - Halyqty jappaı vaktsınalaý máselesi boıynsha aqparattyq túsindirý jumystaryn belsendi júrgizý qajet. Bul týraly Úkimet otyrysynda QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
«Epıdemıologııalyq jaǵdaı Úkimettiń kúndelikti baqylaýynda. Óńirlerde qajetti kólemde vaktsına bar. Degenmen, kelesi baǵyttar boıynsha naqty is-sharalar qabyldanýy qajet. Birinshiden, ákimderden halyqty vaktsınalaý boıynsha jumysty ary qaraı kúsheıtýdi suraımyz. Onyń ishinde aýyl turǵyndaryn egýmen qamtýdy arttyrý qajet. Ekinshiden, halyqty jappaı vaktsınalaý máselesi boıynsha aqparattyq túsindirý jumystaryn belsendi júrgizý mańyzdy. Egý pýnktteriniń jumysy týraly jáne qoljetimdi vaktsınalar jónindegi aqparat turǵyndarǵa keńinen taratylýy qajet», - dedi vıtse-premer.
Úshinshiden, Eraly Toǵjanov kásipkerlik nysandaryna «Ashyq» jobasyn engizý jumystaryn jalǵastyrý kerektigin basa aıtty.
«Búginde bul baǵdarlama respýblıka boıynsha 3 myńǵa jýyq bıznes sýbektileriniń shekteý is-sharalaryna qaramastan qalypty jaǵdaıda jumys isteýine múmkindik berip otyr. Búginde 650 myń adam osy baǵytta jumys istep jatyr. Alaıda, baǵdarlamany bızneske engizý kórsetkishteri Aqmola, Túrkistan, Soltústik Qazaqstan, Qostanaı oblystarynda áli de tómen. Bul baǵytta barlyq óńirde jumys kúsheıtilýi qajet. Onyń ishinde vebkovıd aqparat júıesine aýrýǵa shaldyqqandar jáne baılanysta bolǵandar týraly derekterdi ýaqytynda engizý ákimderdiń erekshe baqylaýynda bolýy tıis», - dedi ol.
