Ákimder halyqpen kezdesýdi jańa formatta ótkizýge túbegeıli kóshýi kerek - Úkimet basshysy

NUR-SULTAN. QazAqparat – Keıbir óńirlerde basshylardyń halyqpen kezdesýdiń jańa formatyna beıimdelmeı, eski súrleýden shyǵa almaı otyrǵandar da bar. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Memleket basshysynyń tapsyrmasy boıynsha ortalyq jáne jergilikti atqarýshy organdar basshylarynyń halyqpen kezdesý kestesi bekitildi. Jańa formatqa sáıkes kezdesýler «júzbe-júz, ashyq tildesý» túrinde ótkiziledi. Oǵan deıin baspasózde jáne áleýmettik jelilerde aqparattyq-túsindirý jumystary júrgiziledi. Óńirlerge jumys sapary kezinde mınıstrler azamattardy jeke qabyldaıdy, qoǵamdyq birlestikterdiń ókilderimen kezdesedi. Josparlanǵan kezdesýlerge oraı azamattardyń ótinishterine arnaıy aldyn ala taldaý júrgizildi. Munyń barlyǵy problemalardy muqııat zerdeleýge, olardy ákimdik deńgeıinde nemese vedomstvoaralyq ózara is-qımyl aıasynda sheshý joldaryn qarastyrýǵa múmkindik beredi», - dedi Á. Smaıylov.

Osy oraıda Úkimet basshysy mınıstrlerge qalalar men aýyldy eldi mekenderdegi uıaly baılanys pen ınternettiń sapasy, elektr qýatyn berý, gazdandyrý, aýyz sýmen qamtamasyz etý, áleýmettik problemalar boıynsha biraz suraq qoıylǵanyn atap ótti.

«Jańa formatqa sáıkes atalǵan problemalardyń sheshimi memlekettik organdardyń resmı ınternet-resýrstarynda da ornalastyrylatyn bolady. Halyqpen kezdesýden soń, barlyq deńgeıdegi ákimder problemalardy júıeleıdi, al olardy qarjylandyrý múmkindikteri máslıhat sessııalarynda qaralady. Sonymen qatar, keıbir óńirlerde kezdesýdiń jańa formatyna beıimdelmeı, eski súrleýden shyǵa almaı otyrǵandar da bar. Kezdesýlerge erkin kirý prıntsıpi saqtalýy kerek», - dedi Premer-Mınıstr.

Foto: primeminister.kz