Ákimder halyqqa jaqyn bola túsedi – sarapshy pikiri

NUR-SULTAN. QazAqparat – Ákimder halyqqa jaqyn bola túsedi. Mundaı pikirdi Qazaqstandyq qoǵamdyq damý ınstıtýtynyń sarapshysy Serik Moldaǵalıev bildirdi, dep habarlaıdy QazAqparat tilshisi.

«Prezıdent jarııalaǵan Jarlyǵynda endigi ýaqytta búkil ákimderdiń halyq aldynda jıi esep beretindigi aıtylǵan. Bul jerde qandaı jańalyq bar? Eń bastysy barlyq ákim, máselen, oblys ákimderi jarty jylda joq degende ár aýdanda jáne oblystyq mańyzy bar qalalarda bir kezdesý ótkizýi tıis. Naqty tsıfrǵa júginer bolsa, aıtalyq bir oblysta 12 aýdan bar deıik. Demek, oblys ákimi jarty jyldyń ishinde barlyq 12 aýdandy aralap, halyqpen kezdesip, olardyń muń-muqtajyn tyńdap, naqty sheshý joldaryn qabyldaýǵa mindetti», - dedi QazAqparat tilshisine telefon arqyly suhbat bergen Serik Moldaǵalıev.

Sarapshy Memleket basshysy Qasym-Jomart Toqaevtyń ákimderdiń halyqpen kezdesýlerin ótkizý týraly Jarlyǵy asa qajet qujat ekendigin alǵa tartady.

«Árıne, óte qajet qujat. Prezıdentimizdiń «Halyq únine qulaq asatyn memleket» tujyrymdamasy aıasynda osy qujat jasaqtalyp otyr. Onyń ústine Memleket basshysy «Jańa Qazaqstan» bastamasyn jarııalaǵan edi. Al bul Jarlyqty sol úrdisterdiń jalǵasy dep qabyldaǵan jón. Sonymen qatar endigi ýaqytta ákimder halyqqa jaqyn bolady dep naqty aıta alamyz», - dedi ol.