Ákimder eńbek qaqtyǵystaryn baqylaýda ustaýy tıis - Úkimet basshysy
ASTANA. QazAqparat - Ákimder áleýmettik-eńbek qaqtyǵystaryn boldyrmaý máselesin baqylaýda ustaýy tıis. Bul týraly búgin eńbek qatynastaryn retteý jaıy qaralǵan Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Ákimder áleýmettik-eńbek qaqtyǵystaryn boldyrmaý máselesin baqylaýda ustap, jumysshylardyń jumystan negizsiz qýylýyna jol bermeýi kerek. Birqatar kompanııalarda eńbek qatynastaryn jaqsartý jáne áleýmettik máselelerdi sheshý boıynsha tıimdi sharalar qolǵa alynǵan. Biz ony bilemiz. Olar Elbasynyń jalaqysy tómen jumyskerlerdiń eńbekaqysyn kóterý boıynsha bastamasyn qoldap otyr. Áleýmettik jobalar júzege asýda», - dedi Úkimet basshysy.
Osy oraıda Asqar Mamın mundaı oń tájirıbeni basqa óńirlerde de qarqyndy engizý kerektigine basa nazar aýdartty.
«Berdibek Máshbekuly, Kásipodaqtar federatsııasy men «Atameken» palatasynyń búgingi usynystaryn qarap, ortaq sheshimge kelý qajet. Sonyń ishinde qaryzdy óteý, ónerkásip qaýipsizdigin qamtamasyz etý, eńbekti qorǵaý boıynsha usynystardy, úshjaqty komıssııalardyń jumys formatyn qaıta qaraý kerek, ásirese óńirlerde. Olar belsendi jumys jasaýy tıis. Bul oraıda formalızmge jol berýge bolmaıdy», - dedi Premer-Mınıstr Eńbek jáne halyqty áleýmettik qorǵaý mınıstri Saparbaevqa qarata.
Sonymen qatar Úkimet basshysy eńbek qaýipsizdigi jónindegi 5 jyldyq jol kartasyn ázirleý qajettigin aıtty.
«Eńbek qaýipsizdigin qamtamasyz etý - asa mańyzdy másele. Osyǵan oraı Eńbek mınıstrligine tıisti memlekettik organdarmen jáne kásipodaqtarmen birlesip, bir aıdyń ishinde eńbek qaýipsizdigi boıynsha 5 jylǵa arnalǵan jol kartasyn daıyndaýdy tapsyramyn. Gúlshara Naýshaqyzy, baqylaýǵa alyńyz», - dedi Asqar Mamın orynbasary Gúlshara Ábdiqalyqovaǵa.
Aıta keteıik, QR Kásipodaqtar federatsııasynyń tóraǵasy Baqytjan Ábdiraıym jumysshylardyń áleýmettik-eńbek quqyǵyn shekteıtin zańnamalyq aktilerge moratorıı jarııalaýdy, oblystyq úshjaqty komıssııalar jumysyn jandandyryp, ujymdyq sharttar boıynsha máseleni turaqty túrde qadaǵalap otyrýdy, jalaqysy tómen qyzmetkerlerdiń eńbekaqysyn satyly túrde kóterýdi usynǵan bolatyn.
