Ákimder bıýdjet qarjysyna salynǵan úılerdegi kemshilikterdi joıýy kerek - Álıhan Smaıylov
«Memlekettik baǵdarlama boıynsha salynǵan turǵyn úılerdiń máselesine jeke toqtalǵym keledi. Memleket turǵyn úı qurylysyna kólemdi qarjy bólip otyr. Biraq, turǵyn úılerdiń sapasyna qatysty shaǵym óte kóp. Aýlalardyń fotosyn qarańyzdar. Bul úılerdiń qaı óńirde salynǵanyn aıtpaı-aq qoıaıyn. Desek te, barlyq jerde osyndaı kórinis. Balalardyń oıyn alańyna da bir qarasańyzdar. Joldardyń jaǵdaıy bólek áńgime. Bul ne qalypty normaǵa aınalǵan ba? Ákimder bıýdjet qarjysyna salynǵan úılerge revızııa jasap, barlyq kemshilikterdi joıýy kerek», - dedi Álıhan Smaıylov Úkimet otyrysynda.
Úkimet basshysy atalǵan máseleni shuǵyl sheship, turǵyn úı qurylysynyń sapasyn qatań baqylaýǵa alý qajettigin aıtty.
«Búginde turǵyn úı-kommýnaldyq sharýashylyq salasynda shuǵyl ári sapaly sheshýdi qajet etetin másele kóp. Jaýapty memlekettik organdardyń jumysynda da halyqtyń áleýmettik osal toptaryn turǵyn úımen qamtamasyz etýde kemshilikter bar. Kezekte turǵandardy baspanamen qamtamasyz etý jumystarynyń sapasyz josparlanýyn da bólek alyp qaraýǵa bolady. Salynyp bitken turǵyn úılerin ala almaı júrgen azamattardan shaǵymdar kóp túsip jatyr. Sebebi, «Otbasy bankinde» jeńildikpen nesıe berýge qajetti qarajat joq», - dedi Úkimet basshysy.
