Ákimder bazarlarda tártip ornatýǵa jumylýy kerek - Úkimet basshysy
ASTANA. 5 qarasha. QazAqparat - Búgin Úkimet otyrysynda QR Premer-Mınıstri Serik Ahmetov «kóleńkeli» ekonomıkamen kúresti jandandyryp, osynyń ósimin joıý qajettigine qatań nazar aýdarýdy tapsyrdy.
Sóz arasynda Úkimet basshysy «kóleńkeli» ekonomıka beleń alǵan naqty 5-6 baǵytty alyp, sonymen ymyrasyz kúresý qajettigin eskertti. «Saýdanyń aıtarlyqtaı basym bóligi bizde ashyq bazarlardan kelip jatyr. Bazarlardaǵy retsiz saýda «kóleńkeli» ekonomıkany odan saıyn áldendirip keledi. Al odan kim baıyp jatyr? Resmı tólem joq, tólemniń bári «kóleńkede» qalyp jatyr, túbirtek berý úderisi de jolǵa qoıylmaǵan. Biz bazarlarǵa qashan tártip ornatamyz osy. Ákimdermen birlesip osyny qaraıyq, sosyn kiriselik jumysqa», - dedi Úkimet basshysy ekonomıka jáne bıýdjettik josparlaý mınıstrine qarata aıtqan sózinde.
«Qanekı, naqty 4-5 baǵytty alaıyq, al siz ekonomıka mınıstri retinde úkimetke, ákimdikterge osy problemany alǵa tartyńyz, sosyn aqyldasaıyq. Naqtylap, 2014-2017 jyldarǵa arnap týra osy iske kiriseıik. Al myna 150 pýnktten turatyn jospardan ne shyǵady? Onyń ornyna eń basty 10-yn alaıyq, sosyn barlyq ákimdermen birigip, soǵan jabylaıyq bárimiz», - dedi Serik Ahmetov.
Onyń aıtýynsha, baqylanbaıtyn ekonomıka tek saýda-sattyqtar men bazarlarda ǵana emes, avtokólik jóndeý salasynan bastap, jeke paıdalanatyn buıymdarǵa deıingi aralyqtarda da tolyp jatyr. «Máselen, ekinshi orynda aýyl sharýashylyǵy, úshinshi orynda kóliktik tasý men saqtaýlar tur», dedi Premer-Mınıstr.
