Ákimder balabaqshalardyń aqshasyn qalaı urlaıdy
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy kúres agenttiginiń mamandary mektepke deıingi mekemelerdi qarjylandyrý salasynda birqatar zań buzýshylyqtardy anyqtady, dep xabarlaıdy QazAqparat tilshisi.
Agenttiktiń qorytyndysyna sáıkes, balabaqshalardy qarjylandyrý salasyndaǵy qylmystardyń deni - bıýdjet qarjysyn urlaý, qyzmet babyn asyra paıdalaný, para alý men jalǵan qujattar jasaý áreketteri.
«Máselen, Ońtústik Qazaqstan oblysynyń Maqtaral aýdanynda «Balapan» men «2016-2019 jyldarǵa arnalǵan bilim berýdi damytý» baǵdarlamalaryn iske asyrý barysynda 100 mln teńgeden astam bıýdjet qarjysy urlandy. Osylaısha, aýyldyq okrýgtardyń ákimderi - Álıev, Ibragımov, Qaldybaev, Turshaev, Erimbetov, Bektursynov pen Satybaldıevter mektepke deıingi mekeme basshylarymen kelise otyryp, balalardyń sanyn qoldan kóbeıtý arqyly aqshany jymqyrǵan», - delingen resmı xabarlamada. Resmı aqparat boıynsha tek eki jyldyń ishinde ákimder myńdaǵan balany birneshe balabaqshada tirkep úlgergen.
Osy ispetti sybaılas jemqorlyq áreketteri Almaty, Shyǵys Qazaqstan, Jambyl, Qyzylorda, Mańǵystaý men Qostanaı oblystarynda anyqtaldy. Ondaı qylmystarǵa, kóp jaǵdaıda, zań normalarynyń ózi jaǵdaı jasap berip otyr. Osyǵan baılanysty agenttik bilim jáne ǵylym mınıstrligine tıisti usynystaryn joldady.
