Ákimder azyq-túlik baǵasyn retteý fýnktsııalaryn paıdalanbaı otyr - Sultanov
«Qazan aıynyń basynan 12 qarashaǵa deıingi jaǵdaı boıynsha, áleýmettik mańyzy bar azyq-túlik taýarlarynyń baǵasy 1,1 paıyzǵa ósti. Bul rette, egin jınaý maýsymyna qaramastan, birneshe taýardyń baǵasy on shaqty paıyzǵa óskeni baıqalady. Máselen, qaraqumyq jarmasy – 46,3, al jyl basynan - 62,9, kúrish – 0,7, jyl basynan beri - 32,3, un 10,2, jyl basynan 27,8 paıyzǵa qymbattady. Qazan men qarasha aralyǵynda baǵanyń tómendeýi mynadaı taýarlar boıynsha baıqalady: kúnbaǵys maıy - 0,4, kartop - 3,4, sábiz - 4,5, pııaz - 5,8, qyryqqabat - 7,7 jáne qant 7,9 paıyz», - dedi mınıstr.
Onyń dereginshe, jyl basynan beri áleýmettik mańyzy bar azyq-túlik taýarlaryna baǵanyń maksımaldyq ósýi Atyraý, Pavlodar, Jambyl, Aqtóbe oblystarynda jáne Nur-Sultan qalasynda baıqalýda.
«Qurmetti Asqar Uzaqbaıuly, (Úkimet basshysy Asqar Mamın) Memleket basshysynyń tapsyrmasy boıynsha, atalǵan óńirlerde ákimderdiń orynbasarlary deńgeıinde jaýapkershilikke tartýdy usynamyn. Bul rette, barlyq óńirlerde negizinen kókónisterge, etke, nan men qaraqumyqqa shekti mánderdiń 15 paıyzǵa asqanyn atap ótemin», - dedi Baqyt Sultanov.
Mınıstrdiń aıtýynsha, áleýmettik mańyzy bar azyq-túlik taýarlaryna shekti mánderdiń eń kóp artýy Qyzylorda, Shymkent jáne Túrkistan qalalarynda 6 taýar boıynsha tirkelgen. ıAǵnı, qyryqqabat, pııaz, sábiz, un, nan jáne sıyr eti qymbattaǵan. Al Almaty, Aqtóbe qalalarynda, Aqmola, Soltústik Qazaqstan jáne Jambyl oblystarynda 5 taýar boıynsha baǵa ósken.
«Maýsymaralyq kezeńde áleýmettik mańyzy bar azyq-túlik taýarlarynyń baǵalaryn turaqtandyrý jáne múmkin bolatyn alypsatarlyq aýytqýlardy boldyrmaý úshin jedel sharalar qabyldaý maqsatynda, 2018 jylǵy mamyr aıynda ákimdikterge áleýmettik mańyzy bar azyq-túlik taýarlarynyń baǵasyn retteý boıynsha fýnktsııalar berildi. Alaıda, búginde is júzinde ákimdikter bul fýnktsııany paıdalanbaı otyr», - dedi ol.
Aıta keteıik, búgingi Úkimet otyrysynda QR Premer-Mınıstri Asqar Mamın azyq-túlik baǵasynyń ósýine jol bergen birqatar sheneýnikti jaýapkershilikke tartýdy tapsyrdy.
