Ákimder aýyl sharýashylyǵyna qatysty aqparatty durys berýi tıis - Kúrishbaev
«Birinshi - azyq-túlik ınflıatsııasy boıynsha. Bıyl aýyl sharýashylyǵy úshin óte qolaısyz jyl boldy. Mundaı jappaı qurǵaqshylyq bizde 30 jyldan astam ýaqyt bolmaǵan. Sondyqtan qazir azyq-túlik taýarlarynyń naqty teńgerimin baqylap otyrý óte mańyzdy. Al ol úshin biz aýyl sharýashylyǵy ónimderi óndirisiniń naqty kólemin bilýge tıispiz. Ókinishke oraı, aýyl sharýashylyǵy ónimderi týraly statıstıkalyq derekterde úılespeıtin, bir birinen alshaq aqparattar bar. Qazir aýyl sharýashylyǵy óndirisiniń kólemi týraly esepti tek zańdy tulǵalar ǵana tapsyrady. Al sharýa/fermer qojalyqtarynan jáne jeke qosalqy sharýashylyqtardan bul derekterdi ıntervıýerler iriktemeli ádispen jınaıdy. Sharýa qojalyqtarynyń tek 30 paıyzy jáne qosalqy sharýashylyqtarynyń bar bolǵany 2,5 paıyz ǵana esep beredi. ıAǵnı olardyń 97,5 paıyzy eshqandaı esep bermeıdi. Basqasha aıtqanda, aýyl sharýashylyǵyndaǵy óndiris kóleminiń edáýir úlesi ákimder jınaıtyn ákimshilik aqparatqa negizdelip aıqyndalady», - dedi ol Senattyń jalpy otyrysynda.
Osy rette senator ákimderdiń aýyl sharýashylyǵynyń jaı-kúıi boıynsha jınaǵan aqparatynyń durystyǵyn qamtamasyz etý jónindegi jaýapkershiligin arttyrý qajettigin basa aıtty.
«Statıstıka basshylarynyń ózderi atap ótkendeı, jergilikti atqarýshy organdar óz reıtingilerin kóterý maqsatynda egin ónimdiligi boıynsha joǵary kórsetkishterge múddeligi statıstıka derekterin burmalaýyna ákelý qaýpi bar. Al burmalanǵan aqparattar «qısyq aına» áserin týdyryp memlekettik organdarynyń mańyzdy sheshimder qabyldaýyna, sonyń ishinde azyq-túlik balansyn retteý jumystaryna negiz bolýy múmkin», - dedi Aqylbek Kúrishbaev.
