Ákimder arnaıy tapsyrma kútpeı, ózderi ınvestıtsııa tartýy kerek – Erkin Tuqymov

ASTANA. QazAqparat – QR Prezıdenti janyndaǵy Qazaqstandyq strategııalyq zertteýler ınstıtýtynyń dırektory Erkin Tuqymov Memleket basshysy Qasym-Jomart Toqaevtyń eldiń áleýmettik-ekonomıkalyq damýy máseleleri jónindegi keńeste júktegen tapsyrmalaryna qatysty pikir bildirdi, dep habarlaıdy QazAqparat tilshisi.

Sarapshy mundaı aýqymdy keńeske máslıhat ókilderi tuńǵysh ret qatysqanyn atap ótti. Onyń paıymynsha, bul - búkil bılikti bir ortalyqqa jumyldyrýdan arylyp kele jatqanyn aıǵaqtaıdy.

«Meniń oıymsha, bul óte jaqsy bastama. Bul tájirıbeni jalǵastyrý kerek. Óıtkeni, máslıhattardyń mańyzdylyǵyn bári birdeı túsine bermeıdi. Onyń ústine máslıhattardyń ózi áli qalyptasý protsesinde. Jasalǵan qadam oryndy, biraq úlken jumys atqarylýy kerek», - dedi Erkin Tuqymov.

Prezıdent óz sózinde máslıhattar jergilikti turǵyndardyń múddesin qorǵaýdy basty baǵdar etip alýy kerektigin basa aıtty. Sonymen qatar, Qasym-Jomart Toqaev ınvestıtsııa tartý boıynsha júrgizilip jatqan jumystardy qaıta jandandyrý qajet ekenin atap ótti.

«Jergilikti bılik bireýdiń arnaıy tapsyrmasyn kútpeı-aq, jumys oryndaryn qurý, óndiristi jolǵa qoıý úshin ınvestıtsııa tartýy kerek. Investıtsııa tartý – ákimderdiń jumysyn baǵalaý úshin de qajetti qural. Degenmen bul jerde beı-bereketsizdikke jol bermeý mańyzdy. Investıtsııalardyń qaı salalarǵa baǵyttalatynyn, olardan ekologııaǵa qandaı zııan kelýi múmkin degen suraqtardy naqty esepke negizdeı otyryp, pysyqtaýy tıis. Munda san emes, sapa da mańyzdy», - dep toqtaldy QSZI dırektory.

Sonymen qatar, Erkin Tuqymov Prezıdent sózindegi elektr energııasy, jylý tarıfteri men janar-jaǵarmaı baǵasynyń birtindep qymbattaýyna qatysty pikir bildirdi. Onyń aıtýynsha, bul másele týrasynda ýákiletti organdar óz ustanymyn jarııalady.

«Men ýákeletti organdarmen kelisemin, tegin eshteńe bolmaıdy. Baǵalar tómen jáne bul naryqtyq ekonomıka. Sýdyń baǵasy boıynsha bizde álemdegi eń tómengi tarıfter qoıylǵan. Árıne, áleýmettik osal toptarǵa kómektesý kerek. Prezıdent bul týraly aıtty jáne biz osy baǵytta naqty is atqarýymyz tıis. Bul máselede eń bastysy – adamdarǵa túsindire bilý qajet. Qazaqstanda problemalarǵa jıi túsindirme berilip júr. Meniń oıymsha, bizdiń halqymyz aqymaq emes. Eger ne úshin jasalyp jatqanyn aıtsań, túsinedi. Biraq halyqqa naqty ári júıeli túsindirý bolmasa, onda munyń teris saldary bolýy múmkin», - dep túıindedi Erkin Tuqymov.

Eske salaıyq, búgin Prezıdent tóraǵalyǵymen elimizdiń áleýmettik-ekonomıkalyq damýy jóninde keńes ótti.