Ákimder «Ákimshilik protsedýralar týraly», «Jeke jáne zańdy tulǵalardyń ótinishterin qaraý tártibi týraly» Zańdardy nashar biledi - Á.Báımenov
ASTANA. 3 maýsym. QazAqparat - Qala jáne aýdan ákimderi «Ákimshilik protsedýralar týraly», «Jeke jáne zańdy tulǵalardyń ótinishterin qaraý tártibi týraly» Zańdardy nashar biledi.
Bul týraly «KTK» telearnasyndaǵy «Halyq qyzmetshisi» baǵdarlamasy barysynda QR Memlekettik qyzmet ister agenttiginiń tóraǵasy Álıhan Báımenov málim etti.
«Shyndyǵymdy aıtsam, men ortaq nátıjege ishteı daıyn edim. Qazirgi kóptegen memlekettik qyzmetshiler óte qarqyndy daıyndalǵandaı kóringen edi. Birqatar oblystardyń ákimderi bizdiń tártiptik keńestermen aptalyq semınarlar da uıymdastyrǵan bolatyn. Bir oblystyń ákimi tipti, test tapsyrýǵa daıyndalýlary úshin qalalar men aýdandar ákimderiniń uıaly telefondaryn 2 kúnge alyp qoıǵan», - dedi ol.
Onyń atap ótýinshe, test tapsyrý barysynda zańdardy jatqa bilý mindetti emes. Óıtkeni árbir zańnyń óziniń ishki logıkasy bar. Test tapsyrýshy tórt nusqanyń birin tańdaý barysynda «oılaý júıesin iske qosyp», durys jaýapty tańdaı alady.
Sonymen qatar Á.Báımenovtiń sózine qaraǵanda, testileý memlekettik qyzmetshilerdiń, ásirese, qalalar men aýdan ákimderiniń «Ákimshilik protsedýralar týraly», «Jeke jáne zańdy tulǵalardyń ótinishterin qaraý tártibi týraly» Zańdarǵa qatysty bilimderiniń tómen ekendigin kórsetti.
