Ákimder AÁK bergende normatıvtik rásimderdi qatań saqtasyn - Asqar Mamın
NUR-SULTAN. QazAqparat - Ákimder ataýly áleýmettik kómek bergende normatıvtik rásimderdi qatań saqtaýy tıis. Bul týraly búgin Úkimet otyrysynda Premer-Mınıstri Asqar Mamın aıtty, dep habarlaıdy QazAqparat tilshisi.
"1 qyrkúıekten bastap turmysy tómen jáne kópbalaly otbasylardan shyqqan balalarǵa 5 myń nysanaly bilim granty qosymsha bólinedi. Jumysshy mamandyqtardyń shákirtaqysy 30 paıyzǵa artady. Ákimder Bilim jáne ǵylym mınıstrligimen birlesip, osy granttardy berýdi qamtamasyz etsin", - dedi ol.
Asqar Mamın Memleket basshysy ataýly áleýmettik kómek berý máselesin retke keltirýdi tapsyrǵanyn atap ótti.
"Sondyqtan barlyq ákimderge búkil normatıvtik rásimderdi qatań saqtaýdy, ataýly áleýmettik kómek alýshylarǵa monıtorıng júrgizýdi tapsyramyn", - dedi Úkimet basshysy.
Munan bólek Premer-Mınıstr Ulttyq ekonomıka mınıstrligine "Atameken" UKP-men birlesip, 1 aı merzimde halyqtyń tabysyn arttyrý maqsatynda óńirlerde skrınıng júrgizý ádistemesin Atyraý, Jambyl, Aqtóbe, Almaty jáne Túrkistan oblystaryndaǵy oń tájirıbesin eskere otyryp bekitýdy tapsyrdy.
"Sonymen qatar oblystar men respýblıkalyq mańyzy bar qalalarda skrınıng júrgizý boıynsha jospar ázirlesin jáne bekitsin. Óńirlerdiń ákimderin osy jospar bekitilgen kezden bastap kásipkerler men úı sharýashylyqtary arasynda saýalnama júrgizýdi qamtamasyz etsin", - dedi Asqar Mamın.
