Ákim Ysqaqtyń «Kóńil qymbat» atty jańa kitabynyń tusaýy kesildi

ASTANA. QazAqparat - Elordadaǵy L.N.Gýmılev atyndaǵy Eýrazııa ulttyq ýnıversıtetinde «Káýsar» mádenı-tanymdyq birlestiginiń jetekshisi, Qazaqstannyń eńbek sińirgen ártisi, professor Kenjeǵalı Myrjyqpaıdyń uıymdastyrýymen aqyn, jazýshy, sazger Ákim Ysqaqtyń «Kóńil qymbat» atty kezdesý keshi ótti, dep habarlaıdy atalǵan oqý ordasynyń baspasóz qyzmeti.

«Káýsar» birlestiginiń dástúri boıynsha Kenjeǵalı myrza kórermenderdi kesh qonaǵynyń ómirbaıanymen, shyǵarmashylyǵymen qysqasha tanystyra otyryp, kesh shymyldyǵyn ashty.

Jaqsy istiń basy Ákim Ysqaqtyń «Kóńil qymbat» atty jańa kitabynyń tusaýkeser rásimimen bastaldy. Avtordyń bastamasymen bul kitaptar ýnıversıtettiń kitap qoryna tabys etildi. Ádettegideı júzdesýdiń alǵashqy bólimi kesh qonaǵynyń jeke shyǵarmashylyǵyn tanystyrý maqsatynda Ákim Ysqaqtyń avtorlyq ánderi men óleńderi kórermenge jol tartty. Atap aıtsaq, Erqasym Zymyhan «Qazaǵym», Mereke Jalǵas «Aýylym altyn besigim», Maral Jumageldi «Janym qazaq», Nursultan Otar «Altyn anam - Otanym», Ardaq Qasymhanov «Bir kem dúnıe», Gúlzat Erýbaı «Eger adammyn deseń», Baǵdat Jaqsylyqova «Asyl Ana», Lashyn Máden «Qumyrsqanyń ıleýindeı ómir», Azamat Nurǵalıev «Seni oılap» syndy san taqyryptardy ózek etken óleńderdi oqyp, boıaý aıshyqtarymen, erekshe mánerimen tyńdarman júregine eriksiz oı saldy. Kesh barysynda Ákim Ysqaqtyń aqyndyq, qaıratkerlik qyrymen qatar sazgerlik óneri de kórermendi tánti etti. Aısáýle Beısenhan «Kóńil qymbat», Aıdar Ámire «Quttyqtaımyn qýanyshyńmen» , Saryarqa toby «Jan aǵa», Baqytjan men Aınur «Ózińe ǵana senemin», Berik Beısenbaı «Jan áke», Astana toby «Sen degende» ánderin oryndady. Osy keshte Ermahan Danııardyń «Anaǵa saǵynysh» áni tuńǵysh ret oryndalyp, tyńdarmandardyń zor yqylasyna bólendi.

Keshtiń ekinshi bóliminde Qazaqstannyń Bas redaktorlar klýbynyń vıtse-prezıdenti Muratbek Toqtaǵazın klýb atynan Ákim Ysqaqty Alǵys hatpen marapattap, «Halyqaralyq jýrnalıster odaǵynyń múshesi» tósbelgisi men kýáligin tabystady. Budan keıin sóz tizginin qolyna alǵan Ákim Ysqaq rýhty óleńderimen kórermen nazaryn salıqaly áńgimege burdy. Osyndaı tamasha keshti uıymdastyrǵan ýnıversıtet rektory, QR Ulttyq ǵylym akademııasynyń akademıgi, professor Erlan Sydyqovqa zor alǵysyn bildirdi. Memlekettik qyzmettegi atqarǵan jumystarynan bir úzik syr shertip, stýdentterdiń san túrli saýaldaryna salmaqty, salıqaly, ázil-qaljyńy aralas jaýaptar qaıyrdy. Aqynnyń ár sózi jastarǵa jastyq shabyt, pák mahabbat, ulttyq rýh syılady desek artyq bolmas. Aqynnyń mándi áńgimesine arqaý bolǵan Malaızııa ýnıversıtetiniń stýdenti Rızagúl esimdi qazaq qyzynyń erligi kópshilikti tań qaldyrdy. Aqynnyń keshine sonaý qııannan arnaıy ushyp kelgen Rızagúl júrekjardy tilegin bildirip, kórermenderdiń qoshemetine bólendi.

Kesh sońynda quttyqtaý sózderge kezek berilip, "Nur Otan" partııasy Tóraǵasynyń Birinshi orynbasarynyń Alǵys hatyn onyń keńesshisi Berik Ýalı saltanatty jaǵdaıda tapsyrdy. Sondaı-aq ýnıversıtet ujymy atynan prorektor, professor Dıhan Qamzabekuly aqynnyń shyǵarmashylyǵyna zor tabystar tileı otyryp, «Kúltegin» medalimen marapattady. «Ádemi-aı» kompanııasynyń dırektory Bahargúl Tólegenqyzy barsha qandastar atynan Ákim Ysqaqqa shynaıy yqylasyn bildire kele, estelik syılyǵyn usyndy.