Ákim toıdan qoly tımeıtin shymkenttik ata-analardy synady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev bala tárbıesine qatysty ótken jıynda toıdyń kóp bolýyn, ondaǵy dastarhanda ysyrapshyldyqqa jol beriletindigin synǵa aldy, dep habarlaıdy «QazAqparat» HAA tilshisi.
«Aptanyń dúısenbisinen bastap jeksenbisine deıin toı. Ata -analar balasyna qaraýǵa ýaqyty joq, óıtkeni toıdan qoly tımeıdi. Ol boryshtiq is sııaqty. Toıǵa baryp, kóriný kerek degen. Toıdyń erteńinde túske taman turasyzdar. Balalar óz betimen. Sodan keıin ol balalar qalaı bolsa solaı tárbıe alyp jatyr», - dedi Janseıit Qanseıituly.
Sondaı-aq oblys ákimi toılardaǵy dastarhan jasaýda da belgili bir tártiptiń joq ekendigin tilge tıek etti.
«Bizdegideı dastarhan jasaý, ysyrapshyldyq esh jerde joq. 500,600-700 adam keletin toı esh jerde joq. Keshegi 45 gradýs ystyqta qansha adam tamaqtan ýlandy. Aınaldyrǵan 5-6 saǵatqa sonsha dastarhan jasaýǵa ne qajeti bar sonshama. Qala berdi sol toıǵa barý úshin kólikke tolyp minip alady. Osyndaı jaǵdaılardyń saldarynan adamdar ólip jatyr. Eki-úsh kúnniń ishinde 6-7 adam qaıtys boldy. Onyń ishinde balalar bar. Toıdan qaıtqan adamdar, iship alyp kólikke nyǵalady»,- dedi Janseıit Qanseıituly.
Bul rette ákim bilim salasy qyzmetkerlerine ata-analarmen túsindirý jumystaryn júrgizýge, olardyń bala tárbıesine kóńil bólýine atsalysýǵa shaqyrdy. Sondaı-aq óz tarapynan memlekettik qyzmetkerlerdiń januıasyna kóbirek ýaqyt bólýge jaǵdaı jasalatynyn atap ótti.
«Men óz tarapymnan da memlekettik qyzmetkerlerdiń jumystan ýaqytynda qaıtýyna jaǵdaı jasaıtyn bolamyn. Áke-shesheniń jylýyn sezinbegen bala qatygez bolady», - deıdi óńir basshysy.
