Ákim saılaýy: ShQO-da aýyl turǵyndarynyń 90 paıyzdan astamy daýys bergen

ÓSKENMEN. QazAqparat - Shyǵys Qazaqstandaǵy 221 saılaý ýchaskesinde aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin saılaý boıynsha daýys berý aıaqtaldy, dep habarlaıdy QazAqparat tilshisi.

Oblystyq saılaý komıssııasynyń tóraǵasy Ersaıyn Nábıevtiń málimetinshe, saılaýshylardyń saılaý ýchaskelerine kelýi 90,9 paıyz bolǵan.

Qazir saılaý ýchaskeleri óz jumysyn aıaqtaǵanyna qaramastan, polıtsııa qyzmetkerleri kúsheıtilgen rejımde qyzmet atqarýda. ShQO polıtsııa departamenti ákimshilik polıtsııa basqarmasynyń bastyǵy Ernar Bazarov ýchaskelerdegi qoǵamdyq tártipti saqtaýǵa barlyǵy 800-den astam polıtsııa jumyldyrylǵanyn atap ótti. Polıtsııa qoǵamdyq tártipti saqtaýmen qatar qyzmetkerleri bıýlletender men hattamalardyń saqtalýyn, olardyń aýdandyq komıssııalarǵa jetkizilýin qamtamasyz etedi.

Oblystyq qoǵamdyq densaýlyq saqtaý departamenti basshysynyń orynbasary Ǵalymbek Alınniń aıtýynsha, barlyq saılaý ýchaskelerinde sanıtarlyq talaptar saqtalǵan, daýys berýge kelgenderdiń arasynda koronavırýs sımptomy bar adam bolmaǵan.