Ákim sasyq aýyzsý týraly: Másele 10 jyldan beri kóterilip keledi
QOSTANAI. QazAqparat - Qostanaı qalasynyń ákimi Bazyl Jaqypovtyń turǵyndarǵa esep berý jıynynda oblys ortalyǵyndaǵy aýyzsý máselesi sóz boldy, dep habarlaıdy «QazAqparat» tilshisi.
Qostanaı turǵyndary kommýnaldyq kásiporyndardyń jumystaryn synǵa aldy. Olar ákimdikten aýyzsýdyń sapasyn únemi qadaǵalap turýdy suraıdy. Sondaı-aq, qys ortasynan bastap aýyz sýdyń túsi sarǵysh tartyp, jaǵymsyz ıis shyǵyp, dámi ózgerip ketkendigin jetkizdi.
«Rasyn aıtý kerek, aýyz sý sapasy nashar. Tat basqan ystyq sý men hlordyń ıisi shyǵyp turatyn salqyn sýdy qalaı paıdalanamyz? Sý qalypqa kelgenshe shúmekti birneshe ýaqyt boıy ashyp qoıý kerek. Al, bosqa aǵyp turǵan sýdyń aqshasyn kim tóleıdi? Ákimdikten kezekshilik uıymdastyryp, kommýnaldyq mekemelerdiń jumystaryn baqylaýlaryńyzdy suraımyz», - dedi qala turǵyny Vladımır Zaharchenko.
Turǵynnyń saýalyna jaýap bergen oblys ákimi Arhımed Muhambetov taıaýda sý tazartqysh stansasynyń ornatylatynyn aıtty.
«Aýyz sýdyń sapasy týraly qala turǵyndarynyń aıtyp júrgen sózderin joqqa shyǵara almaımyz. Iá, sýdyń túsinde de, dáminde de ózgeris bar. Biraq, bul másele ondaǵan jyl boıy kóterilip keledi. Sebebi, Qostanaı qalasy aýyz sýdy sý qoımasynan alady. Bıyldan bastap bul másele sheshilýi tıis. Osy ýaqytqa deıin eski sý sorǵyshtar men qubyrlardy paıdalanyp keldik. Endi zamanaýı sý tazartqysh stansasyn ornatýdy josparlap otyrmyz. Oǵan bıýdjetten 4 mlrd teńge qarastyrylǵan. Aldaǵy jartyjyldyqta jobalyq-smetalyq qujattary ázirlenedi. Keıin jobany arnaıy saraptamadan ótkizemiz», - dep túsindirdi oblys ákimi.
Jıynda belgili bolǵandaı, aýyzsý aqysyn tóleý joly jeńildendi. Óıtkeni, ortalyqtaǵy Ál-Farabı kóshesinde biryńǵaı kommýnaldyq tólem ortalyǵy ashyldy. Mundaı ortalyqtar basqa da móltek aýdandarda ornalastyrylady.
