Ákim: Pavlodar oblysynyń barlyq aýdanynda eń ózekti másele - jaıylym
Pavlodar oblysynyń ákimi qala men aýdan ákimderi, oblystyq basqarma basshylarynyń qatysýymen QR Prezıdentiniń «Ádil memleket. Birtutas ult. Berekeli qoǵam» atty Qazaqstan halqyna Joldaýyn júzege asyrý máseleleri boıynsha jıyn ótkizdi.
Negizgi baǵyttar týraly oblys ákiminiń orynbasarlary aqparat jetkizdi.
Oblys ákiminiń birinshi orynbasary Oleg Krýk aıtyp ótkendeı, kelesi jyly óńirde ınjenerlik jelilerdiń qurylysy men kúrdeli jóndeýi boıynsha 20 jobany júzege asyrý josparlanǵan.
Bul jelilerdiń tozý deńgeıin qysqartýǵa múmkindik beredi.
Keńes barysynda Ábilqaıyr Sqaqov Memleket basshysynyń tapsyrmalaryn oryndaý boıynsha naqty mindetter qoıdy.
Máselen, energııa óndirý qýatynyń naryǵyn keńeıtý jáne «Investıtsııalardyń ornyna tarıfterdi qaıta qaraý» tujyrymdamasyna qatysty QR Energetıka mınıstrligine usynys joldaýǵa belsendi qatysý mindetteldi.
Odan basqa, oblysta paıdalanylmaıtyn jáne zańnamany buzý arqyly berilgen jerlerdi qaıtarý boıynsha jumys júrip jatyr.
Aıtalyq, memleket menshigine 208,1 myń gektar jer qaıtaryldy. Jospar boıynsha jyl sońyna deıin 100 myń gektar jerdi qaıtarý kózdelgen.
Ábilqaıyr Sqaqov bul baǵyttaǵy jumysty kúsheıtýdi tapsyrdy.
- Jaıylym máselesi asa kúrdeli bolyp tur, qarapaıym adamdar jaıylym taba almaı dal bolýda. Qazirde barlyq aýdandardaǵy eń ózekti másele – jaıylym. Bir aýyl mysalynda arnaıy karta syzý kerek. Barlyǵyn tártipke keltiretin ýaqyt keldi, - dedi oblys ákimi.
QR Prezıdentiniń Joldaýy memlekettik saıasattaǵy áleýmettik salanyń basymdyǵyn taǵy bir dáleldedi.
Eń tómengi jalaqynyń mólsheri 60 myńnan 70 myń teńgege deıin ósiriledi.
Oblys ákiminiń orynbasary Aızada Qurmanova aıtyp ótkendeı, 2023 jyldyń 1 qańtarynan bastap oblys boıynsha 21 myń adam memlekettik qoldaýǵa ıe bolady.
Sonymen birge, otbasylarǵa elektrondyq júıe arqyly áleýmettik kómek kórsetýge múmkindik beretin Otbasynyń tsıfrlyq kartasy pılottyq rejımde engizildi.
Foto: .me/baspasozpvl
