Ákim «ne shyqsa da ońtústikten shyǵady» degen támsilge pikir bildirdi
TÚRKІSTAN. QazAqparat - Búgin Túrkistan oblysynyń ákimi Janseıit Túımebaev 2018 jyly atqarylǵan jumystar boıynsha halyq aldynda qorytyndy esep berdi, dep habarlaıdy QazAqparat tilshisi.
Aımaq basshysynyń jyldyq esebin sondaı-aq 5 myńǵa tarta adam selektorlyq rejımde jáne áleýmettik jelilerde tikeleı efırde tyńdaı aldy.
Kópshilik aldynda baıandama jasaǵan Janseıit Túımebaev «Túrkistan oblysy halqynyń ál-aýqatyn arttyratyn ekonomıkalyq júıemizdiń damý baǵyty qandaı bolmaq? Ál-aýqatty arttyrý turǵyndarǵa qyzmet jasaıtyn ınfraqurylymdy qalaı damytamyz? Órkenıet zamanynda Túrkistan oblysynda adam kapıtalyn zamanaýı úlgide qalaı qalyptastyramyz?» degen suraqtar tóńireginde oı qozǵady. Ótken jyly tarıhı sheshim qabyldanyp, Túrkistan oblysy qurylǵanyna, bul basqosýdyń oblystyń jańa ortalyǵy - Túrkistan qalasynda tuńǵysh ret ótip jatqanyn atap ótti.
Sonymen birge, Saryaǵash jáne Maqtaaral aýdandarynyń bólinip, Keles pen Jetisaı aýdandarynyń qurylýy el áleýetin kóterý úshin mańyzdy bolǵanyn jetkizdi.
Óńir basshysy Túrkistan oblysy ekonomıkasynyń negizgi súıreýshi salalary ónerkásip, kásipkerlik, aýyl sharýashylyǵy jáne týrızm ekenine toqtalyp, osy baǵytta aýqymdy jumystar júrgiziletinin aıtty.
Baıandamadan keıingi jaryssózge shyqqan azamattar Túrkistanda mektepterdi kóbeıtý, jas mamandarǵa páter berý, Túrkistannyń jasyl beldeýin molaıtý jónindegi usynystaryn aıta kele, ákim esebin oń baǵalady. Eseptik jıyn barysynda zaldaǵy azamattar da kókeıde júrgen saýaldaryn qoıyp, qanaǵattanarlyq jaýaptaryn aldy.
Atap aıtqanda oblys turǵyndarynyń deni kommýnaldy sharýashylyq, transport, turǵyn úı alý, jumyspen qamtý, jol salý jáne ózge de máseleler tóńireginde máseleler kóterdi. Árbir suraqty muqııat tyńdap, jaýap bergen óńir basshysy aıtylǵan usynystar men shaǵymdar jiti nazarǵa alynatynyn aıtty.
«Elbasymyzdyń Túrkistan óńirine degen qoldaýyn jaqsy bilesizder. Qazir aýqymdy jumystar júrip jatyr. «Ne shyqsa da ońtústikten shyǵady» degen támsilge uqsas sóz bar. Óńirimizdiń shynaıy ómirimen etene tanys adam ol sózdi oblys halqynyń eńbekqorlyǵy men tapqyrlyǵyna degen rızashylyqpen, súıispenshilikpen aıtady. Osy jasampazdyq qýatty durys arnaǵa bura bilsek, Túrkistan oblysyn birge túletetin bolamyz», - dedi oblys ákimi.
