Ákim nan baǵasyn baqylaı almaǵandarǵa sógis jarııalady
ÓSKEMEN. QazAqparat - Óskemen qalasynyń ákimi Jaqsylyq Omar orynbasary men bólim basshylaryna sógis jarııalady. Sógiske sebep bolǵan nan baǵasynyń qymbattaýy, dep habarlaıdy QazAqparat tilshisi.
Nan baǵasynyń kúrt ósýine ákelgen jaǵdaıǵa ýaqytynda sharalar qoldanbaǵany úshin kásipkerlik bóliminiń, aýyl sharýashylyǵy bóliminiń basshylary jáne osy bólimderge jetekshilik etetin qala ákiminiń orynbasary sógis aldy. Sáýir aıynyń basynan bastap qalada birinshi surypty nannyń baǵasy ósken bolatyn.
«Baǵanyń ósýi - ákimdiktiń jaýapty qyzmetkerleriniń sapasyz jumystarynyń saldary. Mundaı ósimdi aldyn ala boljap, kásipkerlermen ózara áreket jasaýǵa bolatyn edi» - dedi Jaqsylyq Omar apparattyq májiliste.
Baǵanyń ósý sebepterin anyqtap, retteý úshin arnaıy jumys toby quryldy. Onyń quramynda qalalyq máslıhat depýtattary men qoǵamdyq uıymdardyń ókilderi bar.
Top músheleri úsh naýbaıhanamen áleýmettik saýda núktelerinde nandy 65 teńgeden satý týraly kelisimge qol jetkizilgenin málim etti.
