Ákim Muztaý shyńyna shyqqan alpınısterdi kútip aldy
ASTANA. QazAqparat - Shyǵys Qazaqstan oblysynyń ákimi Danıal Ahmetov «Qazaqstannyń 20 taý shyńy» ekspedıtsııasynyń alpınıster tobyn kútip aldy, dep habarlaıdy QazAqparat tilshisi «Kazakh Tourism» UK» AQ baspasóz-qyzmetine silteme jasap.
Aıta ketsek, «Qazaqstannyń 20 taý shyńy» ekspedıtsııasyn «Kazakh Tourism» UK» AQ Astana qalasynyń 20 jyldyq mereıtoıyna arnalǵan is-sharalar aıasynda uıymdastyrǵan bolatyn. Danıal Ahmetovtyń aıtýynsha Muztaý shyńy alpınısterdiń ǵana emes, álemniń túrli dinı aǵymdarynyń ókilderiniń de qyzyǵýshylyǵyna ıe. Dál osy Muztaý mańaıyna jyl saıyn Tıbet monahtary keledi. Óıtkeni, Altaı óńiri Shambala qaqpasy (birneshe márte ejelgi mátinderde, sonyń ishinde Kalachakra-tantrda eskertilgen Tıbettiń nemese Azııanyń basqa da aımaqtaryndaǵy ańyz eli) bolyp tabylady.
«Altaı - álemniń besigi», - deıdi Danıal Ahmetov óńirdiń túrli arheologııalyq oljalary týraly sóz qozǵaı kele.
Atalmysh ekspedıtsııa úsh óńirdi: Almaty, Túrkistan, Shyǵys Qazaqstan oblystaryn, ásirese, Tıan-Shannyń batys jáne soltústik jaǵynyń basym bóligin qamtıdy. Marshrýt ári qaraı kópshilik týrızmdi damytý baǵytynda jaıaý, taý marshrýttary jáne alpıadalarǵa qyzyqty bolatyn nysandardy barynsha qamtýǵa tyrysqan.
Іs-sharaǵa 100-den astam adam qatysýda. Olardyń qatarynda kásibı alpınıster, tájirıbeli saıahatshylar, jýrnalıster, tanymal ınternet-blogerler bar. Ekspedıtsııa aıasynda qazirgi bar týrónimder tolǵyraq zerttelip, jańa týrıstik marshrýttar jasalatyn bolady.
Kezdesý barysynda alpınıster ekspedıtsııa jaıly aıtyp, aldaǵy josparlarymen bólisip, jolda kezdesken qıyndyqtaryn baıandady. Danıal Ahmetovtyń ózi de taýdy jáne osy sııaqty ekspedıtsııalardy unatatyndyǵyn, osydan úsh jyl buryn ózi de Muzdaýdy baǵyndyrmaqshy bolǵandyǵyn, áıtkenmen jumys pen ýaqyttyń azdyǵy múmkindik bermegendigin aıtady.
