Ákim qaramaǵyndaǵylarǵa halyqpen etene aralasý kerektigin aıtty
ALMATY. QazAqparat - Almatyda Medeý aýdany ákimi Erjan Jylqybaev qolastyndaǵylarǵa kabınette otyra bermeı, halyq arasyna shyǵýǵa keńes berdi, dep habarlaıdy QazAqparat tilshisi.
Bul týraly ol búgin Medeý aýdany turǵyndarynyń kóshpeli kezdesýinde málimdedi. Osy ýaqytqa deıin 200 myńǵa jýyq turǵyn túrli problemalarmen ákimdikke júgingen. Kóbine halyq jol men jaryqtandyrý máselelerimen keledi eken.
«Jol jabyndysyn jóndeý ótinishi qalalyq Jolaýshylar kóligi jáne avtomobıl joldary basqarmasyna jiberildi. Bul másele 2018 jyly sheshimin tabady. Medeý aýdanynda 120 aýla jabdyqtaldy, oǵan 1,8 mln teńge jumsaldy. Alataý shaǵyn aýdanynda 7 aýla jasaldy. Munda jańa sporttyq alańdar salyndy», - dedi Jylqybaev.
Aıta ketý kerek, Medeý aýdany ákiminiń kóshpeli jıyny 5-ret ótkizilip otyr. Kóshpeli jıyn ótkizilgennen beri 1 myń azamat shaǵymdanyp úlgergen. Saýaldardyń 90 paıyzy sheshimin tapty.
Jıyn barysynda Qazaqstan Respýblıkasy Prezıdenti N.Á.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýyn júzege asyrý aıasynda birqatar máseleler talqylandy.
Aıta ketý kerek, Memleket basshysy 2016 jyly 8 aqpanda ortalyq atqarýshy organdar basshylarynyń, ákimderdiń, ulttyq joǵary oqý oryndary rektorlarynyń halyqqa esep berý kezdesýlerin ótkizý týraly Jarlyqqa qol qoıǵan bolatyn.
«Barlyq deńgeıdegi ákimder jyl saıyn, birinshi toqsan ishinde halyqqa esep berý kezdesýlerin ótkizsin, olardyń barysynda elde iske asyrylyp jatqan reformalar, tıisti ákimshilik-aýmaqtyq birliktiń ótken jyldaǵy áleýmettik-ekonomıkalyq damýy, aýmaqtardy damytý baǵdarlamalarynyń túıindi kórsetkishterine qol jetkizý, ony ári damytýdyń mindetteri men negizgi baǵyttary, óńirdiń áleýmettik-ekonomıkalyq damý basymdyqtaryn aıqyndaý bóliginde jergilikti bıýdjetterdiń jobalaryn qalyptastyrý protsesi týraly habardar etsin»,- delingen bolatyn jarlyqta.
