Ákim qabyldaǵan jetim baspana alatyn boldy - Aqmola oblysy
KÓKShETAÝ. QazAqparat - Aqmola oblysynyń ákimi, «Nur Otan» partııasynyń Aqmola oblystyq fılıalynyń tóraǵasy Málik Myrzalın partııa ǵımaratynda jeke máselelerimen kelgen azamattardy qabyldady, dep habarlaıdy QazAqparat tilshisi əkimdiktiń baspasóz qyzmetine silteme jasap.
Bul joly qoǵamdyq qabyldaýda bolǵan turǵyndar aýyl mektepteri men joldarǵa kúrdeli jóndeý jumystaryn júrgizý, materıaldyq jáne quqyqtyq kómek kórsetý tóńireginde týyndaǵan máselelerdi kóterdi.
Kókshetaý qalasynyń turǵyny Anatolıı Romarenko Stepnıak qalasyndaǵy jyljymaıtyn múlik quqyǵyn qalpyna keltirý jóninde kómek surady. Týǵanynan anasynan aıyrylǵan ol 8 jasqa deıin ájesimen Stepnıak qalasynda turǵan eken. Keıin ájesi ómirden ozǵan soń atalmysh páter oǵan muraǵa qaldyrylǵan. Tul jetimge aınalǵan ol Soltústik Qazaqstan oblysynyń Ǵ. Músirepov aýdanyndaǵy Shóptikól balalar úıine tárbıelenýge jiberiledi. Sol kezde onyń ájesinen mura bolyp qalǵan páteri súrilip ketipti. Birjan sal aýdany ákiminiń orynbasary Ersaıyn Sabyrovtyń aıtýynsha, bul másele aýdan ákimdiginde baqylaýǵa alynǵan.
"Aýdan ortalyǵynda 4 qabatty turǵyn úı qalpyna keltirilýde. Jaqynda Anatolııge osy úıden páter berilip, turaqty jumysqa ornalastyrylatyn bolady", - dep túsindirdi Ersaıyn Sabyrov.
Zerendi eldi mekeniniń turǵyny Záýre Meńdibaeva múgedek balasyn emdetý úshin materıaldyq kómek surady. Oblys ákimi muń-muqtajyn aıtyp kelgen anaǵa zań aıasynda kómektesý týraly oblys densaýlyq saqtaý basqarmasy men Zerendi aýdany ákimdiginiń basshylyǵyna tapsyrma berdi.
Al, Raıhan Tájibaeva esimdi turǵyn Elenovka aýyldaǵy orta mektepke kúrdeli jóndeý jumystaryn júrgizýge kómek surady. Onyń aıtýynsha, irgesi osydan jarty ǵasyr buryn qalanǵan bilim ordasy kúrdeli jóndeý jumystaryn qajet etedi. Dál osyndaı máseleni skaıp arqyly Shortandy aýdanynyń Bozaıǵyr aýylynyń turǵyny da kóterdi. Qoǵamdyq qabyldaýda «Jolymbet-Bektaý» tas jolyna kúrdeli jóndeý jumystaryn júrgizý máselesi de aıtyldy.
Aımaq basshysy qabyldaýǵa kelgen turǵyndardyń árbiriniń saýalyn tyńdaı kele, barlyq ótinishterdi baqylaýǵa alyp, jaýapty tulǵalarǵa tıisti tapsyrmalar beretinin jetkizdi.
