Ákim fýtbol alańdary týraly: Adamdar jasandy kógaldy kesip alyp, úıge tósep qoıady
ASTANA. QazAqparat - Qostanaı oblysynyń ákimi Arxımed Muxambetov aımaqta fýtbol alańdaryn ashý sharalary jaıynda aıtyp berdi, dep xabarlaıdy QazAqparat tilshisi.
«Aqtóbede men 100 fýtbol alańyn saldym. Qostanaıda ótken jyly 14, aǵymdaǵy jyly taǵy 14 salynady. 2020 jylǵa deıin osy óńirde de 100 fýtbol alańy ashylady. Negizi, ondaı alańdardy jasaý qıyn emes. Qaraǵandy qalasynda arnaıy kompanııa bar. Solar jasaıdy. Shamamen, 8-12 mln teńge ketedi. Barlyǵy alańnyń aýdanyna jáne jaryq quraldaryna baılanysty. Qazir árbir aýlada jasap jatyrmyz. Biraq birneshe másele bar. Máselen, keıbir adamdar túnde jasandy kógaldy kesip alady da, saıajaıǵa nemese úılerine aparyp, tósep qoıady. Aqtóbede ondaı jaǵdaılar bolǵan. Qostanaı oblysynda da bar»- dedi A.Muxambetov Qazaqstan fýtbol federatsııasynyń XVII konferentsııasynda.
Oblys basshysynyń aıtýynsha, jergilikti bılik vandaldarǵa qarsy sharalardy qolǵa aldy. Búginde jasandy kógalǵa páter ıelenishýler kooperatıvi jaýapty. Al taýardy jetkizip bergen kompanııa bes jylǵa deıin kepildik beredi. Jasandy kógaldyń kemshilikteri bolsa, aýystyryp alýǵa múmkindik bar.
Al Qostanaıdyń ózinde ortalyq stadıonǵa kúrdeli jóndeý jumystary jalǵasatyn bolady. Sonyń arqasynda atalǵan nysanda oryndardyń sany 9550-ke deıin artady. Buryn 5800 oryn bolǵan. Budan bólek, qalada 3000 adam syıatyn fýtbol maneji salynyp jatyr. Al fýtbol akademııasy 50 jatyn orynǵa eseptelgen. Ol jerde birneshe alań da bolady. Parkte fýtbol-lend aımaǵy da bar. Jalpy, búginde Qostanaı oblysy boıynsha 16 myńnan astam adam fýtbolmen aınalysyp júr. A.Muxambetov atalǵan kórsetkishti 32 myńǵa deıin jetkizýdi kózdeıdi.
Aıta keteıik, kelesi jyly Rýdnyı qalasynda fýtbol akademııasynyń qurylysy bastalady.
