Ákim eskalator oqıǵasy týraly: Operator-dıspetcherler únemi baqylaý júrgizýi tıis
ASTANA. QazAqparat - Saryarqa aýdanynyń ákimi Arman Turlybek Ortalyq bazardaǵy balanyń qolyn qysyp qalǵan eskalator oqıǵasy jóninde pikir bildirdi, dep habarlaıdy QazAqparat.
Ákimniń aıtýynsha, nysan ıesi men eskalatorǵa jumysyna jaýapty kompanııa oqıǵanyń mán-jaıyn anyqtap, materıaldardy quzyrly organdarǵa berýi tıis.
«Kez kelgen eskalatorda apattyq jaǵdaıda toqtatý batyrmasy turýy kerek. Ondaı batyrma joq bolsa, beınebaqylaý ornatylyp, arnaıy bólmede operator-dıspetcherler únemi baqylaý júrgizip, oqys oqıǵada eskalatordy toqtatýy tıis. Bul úshin baqylaý qyzmeti arnaıy bólmede monıtor aldynda otyrýy kerek. Dıspetcherler boldy ma? Sábıdiń qoly qysylyp qalǵanda kómekke keldi me? Muny tekserý anyqtaıdy. Zań júzinde nysan ıesi men eskalatorǵa qyzmet kórsetken kompanııa oqıǵanyń mán-jaıyn anyqtap, materıaldardy quzyrly organdarǵa berýi tıis», - dep jazdy ol áleýmettik jelide.
Sondaı-aq, ákim keıde apattyq toqtatý batyrmasynyń ádeıi ornatylmaıtynyn da atap ótti. Sebebi, keı adamdar batyrmany ermek úshin basyp qalsa, kilt toqtaǵan jaǵdaıda baspaldaqtaǵy adamdar qulap jaraqat alýy múmkin.
«Eskalatory bar ǵımarattar ıesi mehanızmniń tehnıkalyq jaǵdaıyn únemi tekserip otyrýy tıis, dıspetcherler baqylaý bólmesin tastap ketpeýi kerek. Keshegi oqıǵa kóp adamǵa sabaq boldy dep oılaımyn. Eskalatordyń oń jaǵynda turyp, sol jaǵy arqyly qozǵalý kerek. Shekteý syzyǵyn baspańyzdar jáne eskalatordyń qozǵalmaıtyn bóligine júk qoımańyzdar. Balalardy qaraýsyz qaldyrmańyzdar jáne olardyń eńbekteýine, satyny qolmen ustaýyna jol bermeńizder. Qolǵa alǵan syrt kıimder men sharftyń mehanızmde shaınalyp ketpeýi úshin kóterińkirep ustańyz», - dep keńes berdi ákim.
Eske sala ketsek, keshe Astananyń Ortalyq bazaryndaǵy eskalatorda eki jasar qyzdyń qoly qysylyp qaldy. Oqıǵa ornyna kelgen jedel járdem qyzmeti tıisti kómekti kórsetip, sábıdi shuǵyl túrde №2 qalalyq balalar aýrýhanasyna alyp ketken. Sábıdiń eki qolyndaǵy jaraqaty da bastapqy-hırýrgııalyq óńdeýden ótip, gıpspen tańyldy.
QR Investıtsııalar jáne damý mınıstri Jeńis Qasymbek eskalatordyń eski tehnıka emestigin aıtyp, oqıǵany tolyq tekserýge ýáde berdi.
