Ákim bol, halqyńa jaqyn bol: Áleýmettik jeliniń áleýetin túsingen óńir basshylary
Elimizdiń astanasy Nur-Sultan qalasynyń ákimi Baqyt Sultanov Facebook jelisin 2012 jyldan beri paıdalanady. Onda Sultanov óz qyzmetine qatysty mańyzdy málimdemeler men quttyqtaýlardy jarııalap otyrady. Jazba astynan ózge jeli qoldanýshylarynyń qaldyrǵan pikirin kórýge bolady. Ázirge, astana ákiminiń Facebook-te bes myń «dosy» men eki myńǵa jýyq jazylýshysy bar. 
Elorda ákiminiń orynbasary Arman Turlybektiń esimi de Qaznet qoldanýshylaryna jaqsy tanys. Buǵan deıin Saryarqa aýdanynyń ákimi bolǵanda da, Arman Turlybek - áleýmettik jeliniń áleýetin tıimdi qoldana bilgen sheneýnik. Qazir de tutas qalanyń ózekti máseleleri jóninde halyqty tolǵandyrǵan suraqtarǵa jedel jaýap berýge tyrysady. Ázirge, Arman Turlybektiń bes myń «dosy» men 40 myńǵa jýyq jazylýshysy bar.
Pavlodar oblysynyń ákimi Bolat Baqaýovty áleýmettik jeli arqyly tanylǵan Kanada premeri Djastın Trıýdoǵa uqsatýǵa bolady. Aqpan aıynda Bolat Baqaýov Instagramda paraqsha ashyp, eki aıda 15 myńǵa jýyq oqyrman jınady. Paraqshada ákimniń oqıǵalarǵa jeke pikirleri, otbasylyq sýretteri, óńir jaǵdaıy týraly málimetter jazylǵan.
Batys Qazaqstan oblysynyń ákimi Altaı Kólginov Tvıtter jelisin belsendi paıdalanady. Ol da elimizdiń jáne ásirese Batys Qazaqstannyń ózekti jańalyqtarymen jıi bólisedi. Degenmen, Tvıtter - halyq kóp qoldana bermeıtin jeli bolǵandyqtan, keri baılanys joq. Ázirge onyń 431 oqyrmany ǵana bar. 
2019 jyldyń 20 aqpanynda Aqmola oblysynyń burynǵy ákimi Málik Myrzalın qaramaǵyndaǵy ákimderge áleýmettik jelilerge tirkelip, halyqqa bir taban jaqyn bolýdy tapsyrǵan edi. Aqmola oblysynyń qazirgi ákimi Ermek Marjyqpaev ta Kókshetaý qalasynyń ákimi bolyp turǵanda Facebook pen Instagram jelilerine tirkelip, halyqtyń muń-muqtajyna jaýap berýge tyrysqan. Qazir de ákim paraqshalaryn jıi jańartady.
Sonymen birge, Aqmola oblysy ákiminiń orynbasary Marat Iǵalı da áleýmettik jeliniń qanshalyqty mańyzdy ekenin túsinedi jáne el ishindegi oqıǵalardy nazarynan tys qaldyrmaıdy. Feısbýk jelisinde Marat Iǵalıdiń bes myń «dosy» men 10 myńnan astam jazylýshysy bar. 
Keshegi Prezıdent tapsyrmasynan keıin Soltústik Qazaqstan oblysynyń ákimi Qumar Aqsaqalov búgin Facebook-ke tirkeldi. Alǵashqy jazbasynda oblys ákimi áleýmettik jeliniń atqarýshy bılik pen halyq arasyndaǵy baılanys kópiri ekenin, pikirtalastar alańyna aınalyratynyn aıtqan. 
Sondaı-aq Aqtóbe oblysynyń ákimi Ońdasyn Orazalın de Facebook-tegi paraqshasyn ashty. Endi ol áleýmettik jeli arqyly óńirde bolyp jatqan jańalyqtarmen bólisip otyrmaqshy. 
Shyǵys Qazaqstan oblysynyń ákimi Danıal Ahmetovtiń áleýmettik jelilerde birde-bir paraqshasy joq. Esesine, Óskemen qalasynyń ákimi Jaqsylyq Omar men Semeı qalasynyń ákimi Ermak Sálimovti Feısbýk pen Instagramnan tabýǵa bolady.
Shymkent qalasynyń ákimi Ǵabıdolla Ábdirahymovtyń áleýmettik jelilerdegi paraqshalary jańartylmaı, «shań basyp» jatyr. Onyń Tvıtter men Instagramdaǵy sońǵy jazbalary 2018 jyly jarııalanǵan. Toqaevtyń tapsyrmasynan keıin úshinshi megapolıs ákimi bul paraqshalarǵa jan bitirip, halyqpen tikeleı dıalog ornatady dep úmittenemiz.
Shymkenttiń tutas tynys-tirshiligin Ǵ. Ábdirahymovtyń orynbasary, «Bolashaq» baǵdarlamasynyń túlegi Danat Jýmınniń Feısbýktegi paraqshasynan kórýge bolady. Onyń da shekteýli bes myń «dosy» men on myńǵa jýyq jazylýshysy bar. 
Atyraý oblysy ákimdiginiń Telegram chat-kanalyna 5 myńnan astam adam tirkelgen. Azamattardy qabyldaýynyń birinde oblys ákimine turǵyndardyń biri áleýmettik mekeme basshylarynyń qabyldaýynda bola almaı júrgenin aıtyp shaǵymdanǵanda, Nurlan Noǵaev Telegram qosymshasynda tirkelýge keńes bergen. Ákimniń jeke akkaýnty joq.
Budan ózge Almaty qalasy, Mańǵystaý, Qaraǵandy, Qostanaı, Almaty, Jambyl, Túrkistan oblystarynyń ákimderi áleýmettik jelilerge tirkelmegen. Bul óńirlerde halyqtyń ótinishterine jaýap berý jumysyn arnaıy baspasóz qyzmetteri nemese ákimderdiń orynbasarlary atqarady.
