Ákim Astananyń sýyn únemdeýge shaqyrdy
ASTANA. QazAqparat - Sońǵy 10 jylda Astanadaǵy sýdy tutyný kólemi 50 paıyzǵa artty, dep habarlaıdy QazAqparat tilshisi.
«Sýdyń da suraýy bar. Bizde taza sýdy kólik jýýǵa nemese baý-baqshasyn sýarýǵa jumsaıtyndar bar. Máselen, qalamyzdaǵy kólik jýatyn oryndardyń 20 paıyzynda, jer úıde turatyndardyń 21 paıyzynda ǵana sýdy únemdeıtin qural ornatylǵan. Bul óte tómen kórsetkish. Sondyqtan sýdy únemdeý óte mańyzdy másele. Halyqty sýdy únemdeýge shaqyrý boıynsha halyqaralyq tájirıbelerdi taldap, arnaıy sharalar júrgizemiz», - dedi Astana qalasynyń ákimi Áset Isekeshev halyqqa esep berý kezdesýinde.
Qala ákiminiń aıtýynsha, 2018 jyly 48 shaqyrym bolatyn toraptyq sý taratqyshty jóndeý jumystary jalǵasady. Odan bólek, birinshi sorǵy stansasy jańǵyrtylyp, jańa sorǵy stantsııasy men káriz jınaǵysh qurylysy bastalady. Sýdyń tasýy kezinde Kishi Taldykóldegi sý deńgeıi tómendetiledi. Jobalardyń jalpy quny - 68 mlrd teńge, 2018 jyly 9 mlrd teńge bólinedi.
Sondaı-aq, ákim astanalyqtardyń ortalyqtandyrylǵan aýyz sýǵa qoljetimdiligi boıynsha jumys istep jatqandaryn jetkizdi. Qazirgi ýaqytta astanalyqtardyń 2 paıyzy sýdy kósheden tasyp júr. Bul oraıda sýmen qamtý júıelerin júrgizý arqyly kóshelerdegi sý kolonnalaryn alynyp tastalady. 2020 jylǵa deıin 210 sý kolonnasynyń 102-sin alyp tastaý josparlanǵan.
