Ákim arab bıznesmenderin Aqmola oblysyna shaqyrdy
KÓKShETAÝ. QazAqparat - Aqmola oblysynyń ákimi Málik Myrzalın Birikken Arab Ámirliginiń ekonomıka mınıstri Sultan ál-Mansurmen kezdesti, dep habarlaıdy QazAqparat tilshisi ákimdik baspasóz qyzmetine silteme jasap.
Kezdesýde arabtar jaǵy Aqmola oblysynda óndirilgen unnyń alǵashqy kommertsııalyq partııasynyń jetkizilgenine qýanyshty ekenin atap ótti.
Qazaqstandyq 800 tonna eksporttyq unnyń alǵashqy kommertsııalyq partııasyn «INTER TRADE» jaýapkershiligi shekteýli seriktestigi jetkizdi.
Málik Myrzalın arab bıznesmenderine Aqmola oblysyndaǵy astyq, et óńdeý jáne týrızm salalary boıynsha naqty jobalarǵa ınvestıtsııa salýdy usyndy. Onyń ishinde Dubai Investments Park ınvestıtsııalyq parkin ashý máselesi talqylandy. Óńirde barlyq kommýnıkatsııa júıesi tartylǵan ındýstrıaldy aımaq qurý josparda bar.
Óz kezeginde Birikken Arab Ámirliginiń ekonomıka mınıstri Aqmola óńirinde arab kompanııalarynyń qatysýymen halal ındýstrııasy jobasyn qolǵa alýǵa qyzyǵýshylyq bildirdi. Qazirgi kezde, sýsyn jáne azyq-túlik sııaqty halal ónimderiniń kólemi 750 mıllıard teńgeni qurap, jyl saıyn 7 paıyzǵa deıin kóbeıip keledi.
Kelissózder nátıjesinde Arab bıznesmenderinen quralǵan delegatsııa Aqmola oblysyna jumys saparymen keletin boldy.
