Aqyly joldyń tólem erejesi ózgerdi: júrgizýshilerge qosymsha ýaqyt beriledi
ASTANA. KAZINFORM — Qazaqstan Respýblıkasy Kólik mınıstrligi aqyly joldarymen júrý aqysyn tóleý tártibine ózgerister engizdi. Tıisti buıryqqa qol qoıyldy. Bul týraly Kólik mınıstrligi málim etti.
— Jańa ózgerister aqyly joldardy paıdalanýshylar úshin tólem jasaý tártibin jeńildetip, ıkemdirek etýge baǵyttalǵan. Sondaı-aq jolaqysyn ýaqytynda tólemegeni úshin júrgizýshilerdiń ákimshilik jaýapkershilikke tartylý jaǵdaılaryn azaıtý kózdelip otyr, — delingen habarlamada.
Buǵan deıin qoldanysta bolǵan normaǵa sáıkes, júrgizýshi jolaqysyn jeti kúntizbelik kún ishinde tólemegen jaǵdaıda, segizinshi kúni materıaldar Qazaqstan Respýblıkasynyń «Ákimshilik quqyq buzýshylyq týraly» kodeksine sáıkes qaraý úshin kóliktik baqylaý organdaryna jiberiletin.
— Endi jańa tártip boıynsha, eger jeke tulǵa jol júrgen kúnnen bastap 30 kúntizbelik kún ishinde tólem jasamasa, materıaldar 31-shi kúni zańnamada belgilengen tártippen kóliktik baqylaý organdaryna joldanady, — dep habarlady vedomstvodan.
Sonymen qatar alǵash ret jeke jáne zańdy tulǵalar úshin bólek tártip engizilip otyr. Eger zańdy tulǵa esepti aıdan keıingi aıdyń 20-syna deıin tólem jasamasa, materıaldar kelesi kúni kóliktik baqylaý organdaryna jiberiledi.
Atalǵan ózgerister respýblıkalyq mańyzy bar aqyly jol ýchaskelerimen júrgeni úshin tólem jasaýǵa júrgizýshilerge qosymsha ýaqyt beredi.
Qol qoıylǵan buıryq Qazaqstan Respýblıkasynyń zańnamasyna sáıkes alǵashqy resmı jarııalanǵan kúninen bastap 10 kúntizbelik kún ótken soń kúshine enedi.
Eske sala keteıik, «QazAvtoJol» UK» AQ basqarma tóraǵasy Darhan Imanashev bıyl aqyly joldardan 100 mlrd teńge túsýi múmkin ekenin aıtqan edi.
