Aqyly joldardaǵy tólem jasaý erejeleri jeńildeıdi - Kólik mınıstrligi

ASTANA. KAZINFORM – QR Kólik mınıstrligi aqyly tasjoldardaǵy tólem jasaý tártibine qatysty erejelerdi jańartýǵa kiristi.

Jańartylǵan tásilder júrgizýshilerge tólemdi ýaqytyly júzege asyrý úshin qosymsha ýaqyt pen múmkindikter usynyp, tólem jasaý úderisin barynsha yńǵaıly ári túsinikti etýdi kózdeıdi.

Qoldanystaǵy normaǵa sáıkes, eger júrgizýshi jolaqysyn jeti kúntizbelik kún ishinde tólemese, segizinshi kúni materıaldar QR «Ákimshilik quqyq buzýshylyq týraly» kodeksine sáıkes belgilengen tártippen kólik baqylaý organdaryna joldanady.

- Aldaǵy ýaqytta jeńil ári yńǵaıly mehanızm engiziledi: eger jeke tulǵa jolaqysyn paıdalanǵan kúnnen bastap otyz kúntizbelik kún ishinde tólem jasamasa, materıaldar otyz birinshi kúni QR «Ákimshilik quqyq buzýshylyq týraly» kodeksine sáıkes kólik baqylaý organdaryna joldanady.

Buǵan qosa, burynǵy tártipte jeke jáne zańdy tulǵalarǵa bólek talaptar qarastyrylmaǵan bolsa, endi zańdy tulǵalar úshin jeke mehanızm engiziledi. Jańa normaǵa sáıkes, eger zańdy tulǵa eseptik kezeńnen keıingi aıdyń 20-syna deıin tólem jasamasa, materıaldar kelesi kúni kólik baqylaý organdaryna joldanatyn bolady, - dep túsindirdi vedomstvodan.

Usynylyp otyrǵan ózgerister júrgizýshilerge tólem jasaý úderisin yńǵaıly etýge, tólem merzimin ulǵaıtýǵa jáne obektıvti sebepterge baılanysty tólem jasalmaǵan jaǵdaıda ákimshilik jaýapkershilikke tartylý qaýpin azaıtýǵa baǵyttalǵan.

Aıta keteıik, QazAvtoJol 350 shaqyrym aqyly jol ýaqytsha tegin bolatynyn habarlady.