Aqyly joldarda nómirin jasyrǵan júrgizýshilerdiń 2 myńǵa jýyq deregi anyqtaldy
ASTANA. KAZINFORM – Qazaqstanda aqyly avtojoldarda memlekettik tirkeý nómirlerin ádeıi jasyrý nemese jalǵan nómir paıdalaný derekteri kóbeıgen.
«QazAvtoJol» ulttyq kompanııasynyń málimetinshe, 2026 jyldyń basynan beri respýblıkalyq mańyzy bar aqyly jol ýchaskelerinde osyndaı 1942 quqyq buzýshylyq anyqtalǵan.
Kompanııa ókilderi mundaı áreketter kóbine jol aqysyn tóleýden jaltarý jáne avtomatty baqylaý júıelerin aınalyp ótý maqsatynda jasalatynyn atap ótti.
– Memlekettik tirkeý nómirlerin jasyrý nemese jalǵan nómir paıdalaný qoldanystaǵy zańnama talaptaryna qaıshy keledi jáne jol-kólik oqıǵalary kezinde kólik quralyn sáıkestendirýdi qıyndatady, – delingen habarlamada.
«QazAvtoJol» mamandary aqyly joldarda turaqty monıtorıng júrgizip keledi.
Anyqtalǵan quqyq buzýshylyqtar boıynsha materıaldar ishki ister organdaryna jáne patrýldik polıtsııa bólimshelerine zańnamaǵa sáıkes shara qabyldaý úshin joldanady.
Quqyq buzýshylyqtardyń qataryna ózge kólikke tıesili memlekettik nómirlerdi paıdalaný, jalǵan nemese ózgertilgen nómir ornatý, sondaı-aq tirkeý nómirin tanýǵa kedergi keltiretin arnaıy qurylǵylardy qoldaný jatady.
– Mundaı quraldardyń qatarynda arnaıy úldirler, japsyrmalar, perdeler, aınalmaly mehanızmder, elektrondy panelder jáne ózge de qurylǵylar bar, – dep naqtylady ulttyq kompanııa.
Vedomstvo júrgizýshilerge memlekettik tirkeý nómirleri árdaıym taza, anyq kórinetin jáne belgilengen orynǵa ornatylýy tıis ekenin eskertti.
Oqylmaıtyn nemese talaptarǵa sáıkes kelmeıtin nómirler úshin ákimshilik jaýapkershilik qarastyrylǵan.
Al jalǵan nómirlerdi paıdalaný nemese nómirdi jasyrýǵa arnalǵan qurylǵylardy qoldaný budan da qatań jazaǵa, sonyń ishinde kólik quralyn basqarý quqyǵynan aıyrýǵa ákelýi múmkin.
– Júrgizýshilerdi zań talaptaryn saqtaýǵa, memlekettik tirkeý nómirlerin jasyrmaýǵa jáne aqyly avtomobıl joldary úshin tólemdi ýaqytyly tóleýge shaqyramyz, – dep málimdedi «QazAvtoJol» ulttyq kompanııasy.
Aıta keteıik, «Astana qalasynyń aınalma joly» avtojolynyń ýchaskesinde qozǵalys ýaqytsha shekteledi.
