Aqyly joldarda gýmanıtarlyq júkti tasý úshin 40-tan astam ótinim túsken

ASTANA. KAZINFORM – 2024 jylǵy 24 sáýirde «QazAvtoJol» UK» AQ sý tasqynynan zardap shekken oblystarǵa gýmanıtarlyq kómekti jetkizetin jeke jáne zańdy tulǵalarǵa aqyly joldar tegin bolatynyn habarlady. 

Búgingi tańda júrgizýshiler men eriktilerden 40-tan astam ótinim kelip tústi. Gýmanıtarlyq kómektiń kóbisi elimizdiń batys jáne soltústik óńirlerine baǵyttalǵan. Shymkent, Almaty, Óskemen, Oral, Túrkistan jáne Astana qalalarynan kelip túsken negizgi ótinimder «Shymkent-Qulsary», «Shý-Petropavl», «Almaty-Oral», «Taldyqorǵan-Petropavl», «Óskemen-Petropavl», «Astana-Petropavl» baǵyttary arqyly jetkizilip jatyr. Júrgizýshiler aımaqtarǵa azyq-túlik, kıim-keshek, kıiz úılermen jáne basqa da qajetti zattardy jetkizýde.

Esterińiz sala keteıik, aqyly joldar 2024 jyldyń 24 sáýirinen bastap 5 mamyrǵa deıin tegin bolady. Aqyly joldarda tegin júrý múmkindigin paıdalaný úshin kólik júrgizýshileri 1403 baılanys ortalyǵyna habarlasyp, ótinim qaldyrýy qajet.

Ótinim bergen kezde kólik quralynyń memlekettik tirkeý nómirin jáne josparlanǵan baǵytty kórsetý kerek.