Aqyly jolda tólem jasaýdyń jańa tásili engizilip jatyr
ASTANA. KAZINFORM – Qazaqstandaǵy respýblıkalyq mańyzy bar aqyly avtojoldarda jol aqysyn avtomatty túrde tóleýge múmkindik beretin RFID-belgilerdi paıdalanýǵa bolady. Bul týraly «QazAvtoJol» UK» AQ habarlady.
Kompanııa málimetinshe, jańa tehnologııa tólem alý pýnkterinen ótý ýaqytyn qysqartyp, ásirese kólik qozǵalysy qarqyndy kezeńderde kezektiń azaıýyna múmkindik beredi.
RFID-belgi avtokólikke ornatylyp, onyń memlekettik tirkeý nómiri men paıdalanýshynyń jeke shotyna baılanystyrylady. Kólik tólem alý pýnktinen ótken sátte júıe ony avtomatty túrde anyqtap, jol júrý aqysyn jeke shottaǵy qarajattan esepten shyǵarady.
– Júrgizýshige tólem jasaý úshin arnaıy toqtaýdyń qajeti joq. RFID-belgiler tegin beriledi. Olardy respýblıkalyq mańyzy bar aqyly joldardaǵy tólem alý pýnktterinen alyp, sol jerde ornatýǵa bolady. Mamandar qurylǵyny avtokólikke baılanystyrýǵa kómektesedi, – dep habarlady kompanııa.
RFID tehnologııasyn paıdalaný tólem alý pýnktteriniń ótkizý qabiletin arttyrýǵa baǵyttalǵan. Sondaı-aq júrgizýshiler jol aqysyn qolmen tóleýge ýaqyt jumsamaı, tólem pýnktinen toqtaýsyz óte alady.
Belgini alǵannan keıin júrgizýshi jeke shotyndaǵy teńgerimniń oń bolýyn qadaǵalaýy qajet. Qarajat jetkilikti bolǵan jaǵdaıda jol aqysy avtomatty túrde alynady.
RFID-belgini alý, ornatý jáne paıdalaný tártibi týraly tolyq aqparatty «QazAvtoJoldyń» 1403 biryńǵaı baılanys ortalyǵynan alýǵa bolady.
Aıta keteıik, jańa aqyly joldarmen bir aıda jarty mıllıonnan astam kólik ótti.
