Aqyly jolda aqshany qalaı únemdeýge bolady: júrgizýshilerge mańyzdy keńes
ASTANA. KAZINFORM- Qazaqstandaǵy aqyly joldardy paıdalanǵanda tólem tásilin durys tańdaý arqyly shyǵyndy azaıtýǵa bolady. Júrgizýshilerge aldyn ala tólem, abonement jáne RFID-belgi qoljetimdi. Birqatar aqyly ýchaskede jol júrý quny tólemniń saparǵa deıin nemese odan keıin jasalýyna baılanysty ózgeredi.
«Qazavtojol» mekemesiniń habarlaýynsha, únemdeýdiń eń qarapaıym joly – kólik balansyn saparǵa deıin toltyrý. Mysaly, uzyndyǵy 60,75 shaqyrym bolatyn Şýchınsk – Kókshetaý aqyly ýchaskesinde jeńil kólik úshin aldyn ala tólem shamamen 117,21 teńge, al keıin tólense 140,56 teńge bolady.
Júk kótergishtigi 15 tonnadan asatyn júk kóligi úshin bul soma tıisinshe shamamen 2 495,1 jáne 2 940,57 teńgeni quraıdy. Turaqty qatynaıtyn kólikter úshin, ásirese júk tasymaldaýshylarǵa mundaı aıyrmashylyq aıtarlyqtaı únem beredi.
Aldyn ala tólem jasaý tártibi qarapaıym: aqyly ýchaskege kirmeı turyp, kóliktiń memlekettik tirkeý nómirine baılanystyrylǵan balansta qajetti qarajat bolýy kerek. Sondyqtan alys jolǵa shyǵar aldynda balansty tekserip, qajet bolsa aldyn ala tolyqtyrǵan jón. Shottaǵy qarajat pen tólemder tarıhyn KazToll jeke kabıneti arqyly baqylaýǵa bolady.
Aqyly joldardy turaqty paıdalanatyn júrgizýshiler úshin «QazAvtoJol» RFID-belgilerdi engizdi. Belgi kólikke ornatylyp, onyń memlekettik tirkeý nómiri men paıdalanýshynyń jeke shotyna baılanystyrylady. Kólik aqyly ýchaskeden ótken kezde júıe ony avtomatty túrde tanyp, tólemdi balanstan esepteıdi.
RFID-belginiń ózi qosymsha jeńildik bermeıdi. Onyń basty artyqshylyǵy – tólem úderisin avtomattandyrý. Júrgizýshige ár sapar saıyn jeke tólem jasaýdyń qajeti joq. RFID-belgiler aqy alý pýnktterinde tegin beriledi.
Shyǵyndy azaıtýdyń taǵy bir joly – abonement. Ol tıisti aqyly jol ýchaskelerine irgeles eldi mekenderde tirkelgen kólik quraldaryna arnalǵan. Abonementti 30 nemese 365 kúnge rásimdeýge bolady. Bir baǵytpen kún saıyn qatynaıtyn júrgizýshiler úshin ár sapardy jeke tólegennen góri bul tásil áldeqaıda tıimdi bolýy múmkin.
Qysqasha aıtqanda, ara-tura saparǵa shyǵatyn júrgizýshilerge – aldyn ala tólem, turaqty paıdalanýshylarǵa – RFID, al aqyly joldarǵa irgeles eldi meken turǵyndaryna abonement tıimdi.
-«QazAvtoJol» UK» AQ tólem jasaý kezinde tek resmı arnalardy paıdalanýdy jáne SMS nemese messendjerler arqyly kelgen kúmándi siltemelerge ótpeýdi eskertedi. Balansty, bereshekti jáne aqyly joldar týraly aqparatty KazToll júıesiniń resmı servısteri arqyly nemese 1403 baılanys ortalyǵyna habarlasyp bilýge bolady,-delingen habarlamada.
Basty qaǵıda qarapaıym: aqyly jolmen saparǵa shyǵasyz ba – balansty aldyn ala tekserińiz. Bul ári yńǵaıly, ári tıimdi.
Osyǵan deıin Qazaqstanda jaqsy jaǵdaıdaǵy jergilikti joldardyń úlesi 91%-ǵa jetkeni týraly jazdyq.
