Aqyly jolda aqaý anyqtalsa, tólem ýaqytsha toqtatylady – Qazavtojol
ASTANA. KAZINFORM – Elimizde aqyly joldar qataryna taǵy 6 ýchaske qosylady. Bul týraly «QazAvtoJol» UK» AQ basqarma tóraǵasy Darhan Imanashev aıtty.
Spıkerdiń aıtýynsha, aqyly avtojoldar ınfraqurylymyn damytý boıynsha jumystar kezeń-kezeńimen júrgizilip jatyr.
– Qazir el aýmaǵynda jalpy uzyndyǵy 4900 shaqyrymdy quraıtyn 26 aqyly jol ýchaskesi bar. Bıyl qosymsha jańa 6 aqyly ýchaske engizý josparlanyp otyr. Olar: Qaraǵandy–Balqash–Býrylbaıtal, Burylbaıtal–Kúrti, Aqtóbe–Qandyaǵash–Maqat, Taldyqorǵan–Óskemen, Atyraý– Astrahan, Merki–Shý–Býrylbaıtal joldary, – dedi D. Imanashev Úkimettiń búgingi otyrysynda.
Sondaı-aq, aqyly joldarda aqaýlar anyqtalǵan jaǵdaıda jol júrý aqysyn ýaqytsha toqtatý normasy engizildi.
– Qazirgi tańda 14 ýchaskede jalpy kólemi 1 mln 100 myń sharshy metr aqaý tirkeldi. Jóndeý jumystary jol-qurylys maýsymynda qolǵa alynady. Azamattardyń ótinishi boıynsha tólem merzimi 7 kúnnen 30 kúnge deıin uzartylmaq. Ázirge bul ózgeristerdi memlekettik organdar qarastyryp jatyr, – dedi Qazavtojol basshysy.
Eske sala ketsek, ótken jyly aqyly joldardan 87 mlrd teńge kiris túsken. Bul qarajat tolyqtaı joldardy kútip-ustaýǵa baǵyttalǵan. Onyń ishinde 1456 arnaıy tehnıka men jabdyqtar satyp alynǵan, 354 myń sharshy metr jol jabynyna jóndeý júrgizilip, 340 myń tekshe metr kóktaıǵaqqa qarsy materıal sebilgen.
Aıta keteıik, bıyl 9 myń shaqyrymǵa jýyq avtojol jóndeledi.
